Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 146 Hüküm no: 178 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve Yakacık’taki Abdurrahman Ağa tımarının Veli Ağa’ya iltizam olunduğu Vech-i tahrîr-i hurûf budur ki Kocaeli sancağında Yenicekalesi mustahfızlarından Adalar nâhiyesi Kartal ve Yakacık karyesinde Abdurrahman Ağa tımârı demekle ma‘rûf bâ-berat-ı âlîşân mutasarrıf olduğum tımârımızın bin yüz seksen dört senesi Martı ibtidâsından Şubat’ı gāyetine gelinceye değin der-uhde ve iltizâmına tâlib ve râgıb olan izzetlü Hacı Veli Ağa’ya bin yüz guruşa der-uhde ve iltizâm olunup mûmâ-ileyh dahi kabûl edüp ba‘de’l-kabûl ve bedel-i iltizâmı olan meblağ-ı mezkûr bin yüz guruşu ber-vech-i peşîn tamâmen yedinden ahz ü kabz olunmağla yedine işbu zabt temessükü verilmişdir bi-mennihî te‘âlâ gerekdir ki müşârünileyh varup karye-i mezbûre ve tevâbi‘i tımârım karyelerin bir sene tamâmına değin zabt u rabt edüp ve tımâr-ı mezbûra hâsıl kaydolan a‘şâr-ı şer‘iye ve tapu-yı zemîni ber-mu‘tâd-ı kadîm zabt oluna geldiği vech üzere ahz ü kabûl edüp tımârım derûnunda mezrû‘ât ve hâsıl-ı öşr ve ...? zer‘ edenler mûmâ-ileyhi üzerlerine zâbit bilüp ve vâki‘ olan umûrların dahi mûmâ-ileyhe mürâca‘at edüp zabt u tasarrufu husûsunda tarafımızdan ve taraf-ı âhardan ferd-i vâhid dahl ü ta‘arruz etmeyeler. Fî ( ) ( ) sene 1184 El-hakīr Seyyid Ali Sâhib-i tımâr-ı mezkûr