Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 540 Hüküm no: 660 Orijinal metin no: [84b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Beşe b. Mehmed’in, Hoca Üveys Vakfı’na ait arsayı mütevelli izni ile satın aldığı İşbu bâ‘isü’l-kitâb Osman Beşe b. Mehmed nâm kimesne meclis-i şer‘-i hatîr-i lâzımü’t-tevkīrde senede Merhûm Hoca Üveys vakfı’na beş yüz kırk akçe mukāta‘alı olup mahmiye-i İstanbul’da Hocapaşa mahallesinde vâki‘ bir tarafdan vâkıf-ı mezbûrun câmi‘-i şerîfinde imâm olanlara meşrût menzil ve bir tarafdan Hanzâde Sultan’a meşrûta saray arsası ve bir tarafdan ba‘zen hâlâ bostancıbaşı olan umdetü’l-emâcid ve’l-ekârim el-Hâc Mustafa Ağa mülkü ve ba‘zen tarîk-i hâs ve bir tarafdan Merhûm Ahmed Paşa evkāfı’ndan olan pazarcı ve tavukçu dükkânları ile mahdûde bir su kuyusu ve mahzeni müştemile arsa-i hâliyenin vech-i muharrer üzre mutasarrıfesi olan mûmâ-ileyhâ Hanzâde Sultan bt. el-merhûm vezîr Çerkes Mehmed Paşa arsa-i mahdûde-i mezkûrenin hakk-ı tasarrufunu bi’l-fi‘l vakf-ı mezbûr mütevellîsi olan es-Seyyid Ahmed Çelebi izni ile bedel-i ma‘lûma bana ferâğ ve tefvîz ben dahi tefevvuz ve kabûl edip mütevellî-i mezkûr yedime temessük vermişidi nazar olunup mûcebince li ecli’l-istihkâm kıbel-i şer‘-i enverden hüccet-i şer‘iyye verilmesi matlûbumdur deyû mazmûnu min külli’l-vücûh takrîr-i meşrûhunu nâtık ve mütevellî-i mezbûrun hat ve hatmini hâvî temessük ibrâz etmeğin mûcebince li ecli’l-istihkâm taraf-ı şer‘-i şerîfden işbu vesîka-i enîka alâ hüve’l-hakīka ketb olunup yed-i tâlibe def‘ ve i‘tâ olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Efendi el-İmâm, Hasan Efendi b. Veli, Hasan Çelebi b. Veli, Hasan b. Mehmed, Mehmed Beşe b. Mahmud.