Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 541 Hüküm no: 661 Orijinal metin no: [84b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime bt. Rıdvan’ın, ölen Afife bt. Süleyman Çelebi’den bir altın bileziği rehin aldığını iddiasının ispatlanmadığı Medîne-i Galata kazâsına tâbi‘ kasaba-i Beşiktaş mahallâtından Hayreddin Paşa mahallesinde sâkine iken bundan akdem vefât eden Afîfe bt. Süleyman Çelebi nâm hâtunun verâseti zevc-i metrûkü Mehmed Çelebi’ye ve babası mezbûr Süleyman Çelebi’ye ve vâlidesi Âişe nâm hâtuna münhasıra olduğu şer‘an zâhir ve müte‘ayyin oldukdan sonra mezbûr Süleyman Çelebi meclis-i şer‘-i hatîr-i lâzımü’t-tevkīrde yine mahalle-i mezbûre sükkânından işbu bâ‘isetü’l-vesîka Kerime bt. Rıdvan nâm hâtun mahzarında üzerine da‘vâ ve takrîr-i kelâm edip kızım müteveffât-ı mezbûre Afîfe hâl-i hayâtında üç bin iki yüz yetmiş akçe kıymetli bir çift altın bileziğini mezbûre Kerime’nin yedine teslîm edip var bu bileziği bir kimesneye rehn vaz‘ edip bana yirmi beş esedî guruş alıver demekle ol dahi zikr olunan bileziği ahz u kabz eyledikden sonra kızım mezbûre Afîfe vefât etmekle zikr olunan bilezik mezbûre Kerime’nin yedinde kalmışidi hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mezbûre Afîfe’nin hayâtında üç bin iki yüz yetmiş akçe kıymetli bir çift altın bileziği vech-i muharrer üzre yedinden ahz u kabz edip üzerine red veya zamândan bir nesne lâzım gelmediğine mezbûre Kerime’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Çavuş el-Mübâşir, Abdullah Bey b. Ali, Ahmed Çelebi b. Ali, Mehmed Bey b. Abdullah, Baba Resul b. Rıdvan ve gayruhüm.