Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 553 Hüküm no: 679 Orijinal metin no: [86b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdülkādir’in bir miktar sermaye ile şişhanesini İsak v. Avraham’a kiraya verip karşılığını tahsil ettiği Mahmiye-i İstanbul’da Hobya[r] mahallesi sâkinelerinden Sâliha bt. Abdülkādir Efendi tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Hürrem Çavuş b. İlyas ve Hüseyin b. Mehmed nâm kimesneler şehâdetleriyle şer‘an sâbit olan Mustafa Bey b. Hasan nâm kimesne meclis-i şer‘-i şerîfde Samatya cemâ‘atinden bâ‘isü’s-sifr İsa[k] v. Avraham nâm Yahudi tarafından husûs-ı âti’l-beyâna vekîl olduğu Receb Bey b. el-Hâc Mehmed ve Mustafa b. İsa nâm kimesneler şehâdetleri ile şer‘an sâbit olan Mehmed Çavuş b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Sâliha mahmiye-i mezbûrda ( ) mahallesinde vâki‘ ma‘lûmü’l-hudûd şişehânesini müvekkil-i mezbûr İsak’a bundan akdem ayda beş bin akçe îcâr ve teslîm mezbûr İsak dahi istîcâr ve tesellüm ve on altı ay zabt edip on altı ayda ücreti olan seksen bin akçeyi müvekkilem mezbûreye teslîm edip müvekkilem dahi kabz ettikden sonra zikr olunan şişehâneden mezbûr İsak müvekkilesi andan? üç bin cam isterler ânı işleyinciye bir ay dahi şişehâneyi ayda ücreti olan beş bin akçeden mâ‘adâ ol camların kā’idesinin nısfını dahi sana vereyim deyip ba‘dehû zikr olunan şişehânemi bir ay dahi zabt etmekle dükkân-ı mezbûrun bir ayda olan ecr-i misli kā’idesinin nısfı vekîl-i mezbûrdan taleb ettiğimde ba‘de’n-nizâ‘ muslihûn tavassutlarında mezbûr Mehmed Çavuş ile beynimizde yüz kıt‘a esedî guruş üzerine inşâ-i akd-i sulh ettiklerinde sulh-i mezbûru bi’l-vekâle kabûl ve bedel-i sulh olan meblağ-ı mezbûru vekîl-i mezbûr Mehmed Çavuş yedinden tamâmen işbu meclis-i nizâ‘da ahz u kabz ettikden sonra husûs-ı mezbûra ve müvekkilenin mukaddemâ mezbûr İsak’a sermâye edinmek için verdiği yüz yirmi bin akçeye müte‘allika âmme-i hukūk-ı matlûbe ve mechûle da‘vâsından mezbûr İsak’ın kefîlleri olan zevcesi Hamile Haron ve oğlu Yako ve vekîl-i mezbûr Mehmed Çavuş’un zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim min‘ ba‘d mazmûn-ı kitâba muhâlif benden bi’l-vekâle ve müvekkilemden bi’l-asâle da‘vâ dahi sudûr ederse makbûl ve mesmû‘a olmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-eşbâh Veli Çavuş, Resul Efendi el-İmâm, Berber Süleyman b. ( ), Mehmed Çelebi b. Abdullah, Baba Resul b. Rıdvan.