Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 554 Hüküm no: 680 Orijinal metin no: [86b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Beşe b. Mehmed’in, köle alışverişinden Halil b. Mehmed’den alacaklı olduğu İşbu bâ‘isü’l-kitâb İsmail Beşe b. Mehmed nâm kimesne meclis-i şer‘-i şerîfde mahmiye-i İstanbul’da vâki‘ Macuncu hamamında hamamcı olup işbu sene-i mübârekede hacc-ı şerîfe azîmet eden Hacı Halil b. Mehmed’in cemî‘ umûrunu görmeğe vekâlet-i mutlaka ile tarafından vekîli olduğu mahmiye-i İstanbul’da Arabacılar mahallesinde sâkin Hacı Ahmed b. Abdülmümin ve Hacı Ali b. Mustafa nâm kimesneler şehâdetleriyle şer‘an sâbit olan Hacı Mustafa b. Hasan nâm kimesne mahzarında da‘vâ ve takrîr-i kelâm edip târih-i kitâbdan iki sene mukaddem orta boylu, açık kaşlı, sarı sakallı, görk gözlü Moskoviyyü’l-asl Kaytas b. Abdullah nâm abdi müvekkil-i mezbûr Hacı Halil’den kırk altı esedî guruşa iştirâ [ve] def‘-i semen eylediğimden sonra ben dahi mevsûf-ı mezbûru odabaşı Hacı Ömer Beşe b. Abdullah nâm kimesneye evsâfı beynimizde ma‘lûm ( ) guruş kıymetli Gürciyyü’l-asl Dilâver nâm abd ile yirmi üç esedî guruşa bey‘ ve kabz-ı semen edip abd-i mezbûr merkūm Ömer Odabaşı’nın yedinde iken mahrûse-i Galata’ya tâbi‘ kasaba-i Tophâne mahallâtından Sandıkbaşı mahallesinde sâkin Ahmed Beşe b. Şaban nâm kimesne müstahık çıkıp mezbûr Ömer Odabaşı’nın husûs-ı mezbûra tarafından vekîl-i müsecceli olan Muharrem Odabaşı b. Hüseyin’den vech-i şer‘î üzre da‘vâ ve müdde‘âsını huzûr-ı hâkimü’ş-şer‘de beyyine-i âdile ile vekîl-i mezbûr muvâcehesinde ba‘de’l-isbât ve’l-hükm yedinden ahz edip vekîl-i mezbûr Muharrem Odabaşı müvekkilinin bana def‘ eylediği semen-i mezbûru yedinde olan mazmûn-ı müsbete-i hüccet-i şer‘iyye mûcebince hükm-i hâkim ile benden ahz u kabz etmekle ben dahi müvekkil-i mezbûr Hacı Halil’e def‘ eylediğim semen-i mezbûru vekîl-i mezbûra mürâca‘at edip taleb ederim suâl olunsun dedikde gıbbe’s-suâl vekîl-i mezbûr Hacı Mustafa cevâbında müvekkili merkūm Hacı Halil târih-i mezbûrda müdde‘î-i merkūma kırk altı esedî guruşa mevsûf-ı mezbûr Kaytas’ı bey‘ ve kabz-ı semen ettiğini bi’l-vekâle ikrâr ve lâkin abd-i mevsûf-ı mezkûr merkūm Ömer Odabaşı yedinde iken mesfûr Ahmed Beşe müstahık çıkıp vech-i meşrûh üzre hükm-i hâkim ile ahz edip ba‘dehû vekîl-i mezbûr Muharrem Beşe müvekkilinin müdde‘î-i merkūma def‘ eylediği hücec-i mezbûra mürâca‘at edip hükm-i hâkim ile ahz ettiğini inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezkûrda Cerrâhbaşı İshak Bey mahallesi sükkânından İbrahim Çelebi b. Himmet ve Mehmed Çelebi b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i merkūm İsmail Beşe târih-i mezkûrda vekîl-i mezbûrun müvekkili olan merkūm Hacı Halil’den kırk altı esedî guruşa bizim huzûrumuzda iştirâ ve def‘-i semen ettiği mevsûf-ı mezkûr Kaytas’a müvekkil-i mezbûr Ömer Beşe’nin yedinde iken merkūm Ahmed Beşe müstahık çıkıp vekîli Muharrem Odabaşı’ndan vech-i şer‘î üzre huzûr-ı hâkimü’ş-şer‘de da‘vâ ve ba‘de’l-isbât ve’l-hükm mevsûf-ı mezbûru yedinden ahz u kabz eyledikde ol dahi bi’l-vekâle müvekkilinin merkūm İsmail Beşe’ye def‘ eylediği semen-i mezbûra mürâca‘at edip yedinde olan hüccet-i şer‘iyye mûcebince ba‘de’l-hükm müdde‘î-i mezbûrdan medfû‘u olan semen-i merkūmu tamâmen ahz u kabz etmeğin hâlâ müdde‘î-i mezbûr İsmail Beşe için müvekkil-i merkūm Hacı Halil’den semen-i merkūm kırk altı esedî guruşu hak ve taleb ve ahz vardır biz bu husûsa bu vech üzre şâhidleriz şehâdet dahi ederiz deyû edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Beşe b. Yusuf, diğer Mustafa Beşe b. Musa, Gazanfer Bey b. Tevekkül, Mehmed b. Ramazan.