Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 572 Hüküm no: 704 Orijinal metin no: [89b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Süleyman Halife Zâviyesi şeyhi iken vefat eden Ömer Efendi’nin vakfettiği nakdin muhafazası için nâzıra teslim edildiği Mahmiye-i İstanbul’da Sofular mahallesinde vâki‘ Şeyh Süleyman Halîfe zâviyesi’nde Şeyh iken vedâ‘-i âlem-i fânî eden merhûm sâhibü’l-hayr Ömer Efendi b. Mehmed’in vakfiyye-i ma‘mûlün-bihâsı nâtık olduğu üzre gallesini ta‘yîn ettiği mürtezikanın vazîfelerinden mâ‘adâsı zâviye-i mezbûre fukarâsının ta‘âmiyelerine meşrûta vakfı olan nukūdun nâzırı olup zâviye-i mezbûre şeyhi olan Uğurlu Mehmed Efendi b. Mustafa meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vakf-ı mezbûrun meşrûtiyyet üzre mütevellîsi olan umdetü’l-müderrisîni’l-fihâm Musa Efendi b. Ali mahzarında üzerine da‘vâ ve takrîr-i kelâm edip mütevellî-i mezbûr vâkıf-ı mezbûrun vech-i mübeyyen üzre vakf ettiği bin kıt‘a riyâlî guruşu esedî guruşa tebdîl edip rehn-i kavî ve kefîl-i melî ile mâl-ı vakf-ı mezbûru ribh-i şer‘î ile istidâneye tâlib var iken mûmâ-ileyh Musa Efendi mâl-ı mezbûru Şehzâde câmi‘inde hıfz edip istirbâh etmemekle ehl-i vezâyife ve zâviye-i mezbûre fukarâsına gadr edip şart-ı vâkıfa ri‘âyet etmeyip ve vâkıf-ı mezbûr mâl-ı vakf-ı mezbûru nâzır hıfz eyleye deyû vakfiyesinde şart ve tasrîh etmekle mütevellî-i mezbûrun yedinde olan meblağ-ı mevkūf-ı mezbûr bin guruşu hıfz için taleb ettiğimde bana teslîmden imtinâ‘ eder suâl olunup vech-i muharrer üzre hıfz için bana teslîme mûmâ-ileyh Musa Efendiye tenbîh olunmak matlûbumdur dedikde, gıbbe’s-suâl mûmâ-ileyh Musa Efendi cevâbında hâl bast olunan minvâl üzredir, lâkin mâl-ı vakf-ı mezbûru mukaddemâ nâzırı olan Ahmed Ağa ma‘rifetiyle erbâb-ı zimemden aldığımızda esedî guruş riyâlî guruşdan ervec ve a‘lâ olup vakfa enfa‘ olmağla riyâlî guruş yerine esedî guruş olunup vech-i muharrer üzre istirbâha tâlib bulunmamağla ihtimâmen câmi‘-i mezbûrda vaz‘ olunmuşidi dedikde mütevellî-i mezbûra meblağ-ı mezbûru vech-i mübeyyen üzre tebdîl ettiği için şer‘an bir nesne lâzım olmamağın meblağ-ı mezbûru müdde‘î-i merkūm Uğurlu Mehmed Efendi’ye hıfz için teslîme mütevellî-i merkūm Musa Efendi’ye tenbîh olundukdan sonra nâzırı merkūm Uğurlu Mehmed Efendi meclis-i şer‘-i mezbûrda mütevellî-i mûmâ-ileyh Musa Efendi mahzarında ikrâr ve takrîr-i kelâm edip ânifen bana teslîme tenbîh olunan bin esedî guruşu hıfz için mütevellî-i mûmâ-ileyh Musa Efendi bana teslîm edip ben dahi vech-i mübeyyen üzre ahz u kabz eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Zahrü’l-müderrisîn Ahmed Efendi b. Mehmed, fahrü’l-müderrisîn İbrahim Efendi b. Receb, umdetü’l-müderrisîn Ahmed Efendi [b.] Hasan, Hüseyin Efendi [b.] Ahmed el-Müderris, Mehmed Efendi [b.] Nurullah, Şeyh Mustafa Efendi [b.] Abdürrahim.