.:: İstanbul Kadı Sicilleri ::.


Bab Mahkemesi 3 Numaralı Sicil (H. 1077 / M. 1666 - 1667)
cilt: 17, sayfa: 573
Hüküm no: 705
Orijinal metin no: [89b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âişe bt. Abdullah’ın İbrahim Efendi b. Mehmed’e sattığı evin komşusu Musli Paşa’nın şüf‘a hakkı sebebiyle müdahale ettiği ve keşfi

Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi irsâl olunup ol dahi hâssa mi‘mârlarından üstâd Mustafa Halîfe b. Ali ile Dârü’l-hilâfeti’l-aliyye Kostantıniyye el-mahmiyye mahallâtından Kapıağası mahallesinde vâki‘ bir tarafdan sâbık Şâm-ı şerîf defterdârı olan umdetü erbâbi’t-tahrîr ve’l-kalem İbrahim Efendi b. Mehmed mülkü ve bir tarafdan ba‘zen Dilâver Çavuş hâtunu ve ba‘zen düstûr-ı ekrem vezîr-i mükerrem sa‘âdetlü Musli Paşa -dâme birruhû ve feşâ- hazretlerinin mülkleri ve bir tarafdan yine paşa-yı mûmâ-ileyh mülkü ve ba‘zen Abdülkerim Efendi mülkü ve bir tarafdan Âişe Hâtun mülkü ile mahdûd menzilin üzerine varıp zeyl-i vesîkada isimleri terkīm olunan müslimîn huzûrlarında akd-i meclis-i şer‘-i mübîn eyledikde mûmâ-ileyh Musli Paşa hazretleri taraf-ı bâhirü’ş-şereflerinden husûs-ı âti’l-beyâna nehc-i şer‘î ve tarîk-i [mer‘î] üzre sâbitü’l-vekâle vekîl olan fahrü’l-akrân Halil Bey b. Bâli nâm kimesne meclis-i ma‘kūd-ı mezbûrda takrîr-i kelâm edip menzil-i mahdûd-ı mezbûru mâlike olan mezbûre Âişe bt. Abdullah nâm hâtun bundan akdem işbu hâzır bi’l-meclis mûmâ-ileyh İbrahim Efendi’ye bin iki yüz kıt‘a esedî guruşa bey‘ ve teslîm ettiği müvekkil-i mûmâ-ileyh hazretleri istimâ‘ ettiği anda taleb-i müvâsebe ve ba‘dehû vech-i şer‘î üzre taleb-i işhâd edip ba‘dehû mûmâ-ileyh İbrahim Efendi ile mürâfa‘a-i şer‘-i şerîf olunduğunda işbu yedimde olan hüccet-i şer‘iyye mûcebince şuf‘a hükm olunup ve mezbûr Abdülkerim Efendi’nin şuf‘ası bâtıla olup menzil-i mezbûr müvekkil-i mûmâ-ileyh hazretleri ile müşârün-ileyh İbrahim Efendi beynlerinde ale’s-seviy taksîm olunmak lâzım gelmeğin mûmâ-ileyh İbrahim Efendi’ye suâl olundukdan sonra menzil-i mezbûr mesâha olunup nısfı müvekkil-i mûmâ-ileyh hazretleri için ve nısf-ı âharı mûmâ-ileyh İbrahim Efendi için ifrâz olunup mûmâ-ileyh İbrahim Efendi semen-i mezkûrun nısfını benden alıp menzil-i mezbûrun nısfını bana teslîm eylemesi bi’l-vekâle matlûbumdur dedikde mevlânâ-yı mezbûr mûmâ-ileyh İbrahim Efendi’ye suâl eyledikde mûmâ-ileyh İbrahim Efendi dahi kaziyye minvâl-i muharrer üzre olduğu tâli‘an ikrâr edip iktisâma tâlib olduğundan sonra mi‘mâr-ı mezbûr menzil-i mezbûru vekîl-i merkūm ile müşârün-ileyh İbrahim Efendi muvâcehesinde mesâha eyledikde arsa-i hâliyesi tûlen yirmi üç ve arzen bir başı yirmi iki ve bir başı on üç buçuk zirâ‘ bi hesâb-ı terbî‘î dört yüz sekiz zirâ‘ altı parmak ve binâsı arsası tûlen on altı parmak ve arzen on dört zirâ‘ bi hesâb-ı mezbûr iki yüz otuz bir zirâ‘ olduğu müte‘ayyin oldukdan sonra menzil-i mesfûrun nısfı olup müvekkil-i müşârün-ileyh hazretleri mülkü tarafında olan iki yüz dört zirâ‘ üç parmak arsa-i hâliye ile yüz on beş buçuk zirâ‘ binâsı arsa[sı] müvekkil-i mûmâ-ileyh hazretlerinin hissesine ve mâ‘adâsı mûmâ-ileyh İbrahim Efendi’nin hissesine ta‘yîn olunup beynlerinde alâmât-ı fâsıla nasb olundukdan sonra mûmâ-ileyh İbrahim Efendi meclis-i mezbûrda vekîl-i merkūm mahzarında bi’t-tav‘i’s-sâf ikrâr ve i‘tirâf edip semen-i mezkûrun nısfı olan altı yüz kıt‘a esedî guruşu vekîl-i mezbûr yedinden işbu meclisde tamâmen ahz u kabz edip menzil-i mesfûrdan vech-i mübeyyen üzre müvekkil-i müşârün-ileyh hazretlerinin arsasına ta‘yîn olunan vekîl-i mezbûra teslîm edip ol dahi müvekkil-i müşârün-ileyh hazretlerinin hissesine ta‘yîn olunan yeri cemî‘ tevâbi‘ ve levâhıkı ve âmme-i hukūk ve merâfıkı ile müvekkil-i mûmâ-ileyh hazretlerinin mülkü ve hakkı olup kat‘â benim alâkam kal[ma]mışdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î husûs-ı mezbûru mevlânâ-yı merkūm mahallinde tahrîr ba‘dehû ma‘an irsâl olunan Hasan Çelebi b. Bayram ve Receb Çelebi b. Bâli ile meclis-i şer‘-i şerîfe gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi selhi Şa‘bâni’l-mu‘azzam li sene seb‘a ve seb‘în ve elf.


Şuhûdü’l-hâl: Fahrü’l-müderrisîni’l-kirâm Şaban Efendi, fahrü’l-akrân Ahmed Ağa b. Abdülmennân, fahrü’l-akrân ve’l-ekfâ Arabacıbaşı Mehmed Ağa, Kasım Bey b. Abdi, Berber Usta Mehmed b. Abdünnebi, Hasan Çavuş b. Abdullah.