Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 574 Hüküm no: 706 Orijinal metin no: [89b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İsmail Efendi b. Bâli’nin vârisleri tarafından Himmet Beşe b. Mehmed’e açılan alacak davasından vazgeçtikleri Mahmiye-i İstanbul’da Balaban Ağa mahallesi ahâlîsinden iken bundan akdem vefât eden İsmail Efendi b. Bâli’nin verâseti sulbî kebîr oğulları Musa Çelebi ve Mehmed Çelebi’ye ve sulbiye kebîre kızı Âişe’ye münhasıra olduğu şer‘an sâbit ve mütehakkik oldukdan sonra mezbûrân Musa Çelebi ve Mehmed Çelebi asâleten ve mezbûre Âişe tarafından husûs-ı âti’l-beyâna vekîl olduğu yedinde olan mazmûn-ı müsbet-i hüccet ile sâbit olan Hasan Bey b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Himmet Beşe b. Mehmed nâm kimesne mahzarında her biri ikrâr ve takrîr-i kelâm edip müteveffâ-yı mezbûr hayâtında yirmi dört kîse içinde olan on iki bin guruşu mezbûr Himmet Beşe’ye bi tarîki’l-mudârebe def‘ ve teslîm edip mezbûr Himmet Beşe dahi kabz ve tesellüm ettikden sonra mezbûr İsmail Efendi kable’l-ahz vefât edip meblağ-ı mezbûr merkūm Himmet Beşe yedinde kalmışidi deyû bundan akdem mezbûr Himmet Beşe’den da‘vâ eylediğimizde ol dahi inkâr etmekle beynimizde nizâ‘-ı küllî vâki‘ olmuşdu hâlâ da‘vâ-yı mezbûreden merkūm Himmet Beşe’yi ibrâ-i âmm-ı kātı‘ü’n-nizâ‘ ile ibrâ ve iskāt eyledik dediklerinde gıbbe’t-tasdîk mâ vaka‘a bi’t-taleb [90a] ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Seyyid Abdülbâkī Efendi el-İmâm, Mehmed Efendi [b.] Bilâl, Mehmed Ağa b. İbrahim, Hacı Receb b. Mahmud, Hasan Bey b. Abdullah.