Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 54 Hüküm no: 6 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin evini sattığı Vaka‘a’l-ibtidâ mine’t-târîhi’l-mastûr fî-hâtimeti’l-vesîkati’l-mukayyedeti evvelen ba‘de ihrâkı cemî‘i’s-sicillât, harrarahü’l-fakīr es-Seyyid Hüseyin el-müvellâ ...? bi-mahkemeti Ahi Çelebi min-mehâkimi Kostantıniyye el-mahmiye ufiye anhü. Mahmiye-i İstanbul’da Âşir Paşa Mahallesi’nde sâkin Ali Efendi b. Ahmed nâm kimesne meclis-i şer‘-i hatîr-i lâzımü’t-tevkīrde işbu el-Hâc İlyas b. Abdülgani nâm kimesne muvâcehesinde ikrâr u i‘tirâf edip mahalle-i mezbûrede vâki‘ bir tarafı Ketenci el-Hâc Mahmud ve bir tarafı sâbıkā mukābeleci olan el-Hâc Hüseyin ve bir tarafı Attâr Hamza mülkleri ile ve bir tarafı tarîk-i hâs ile mahdûd ve mümtâz olup iki bâb tahtânî ve iki bâb fevkānî odalar ve bir matbahı ve kapı üstünde olan iki bâb oda ve ahırı ve kenîfi ve bi’r-i mâyı ve eşcâr-ı müsmire ve gayr-ı müsmireyi hâvî cüneyneyi müştemil menzilimi bi-cümleti’t-tevâbi‘ mezbûr el-Hâc İlyas’a fıddî-i Osmânî râyic fi’l-vakt yüz bin akçe -ki tekîden li’l-asl nısfı elli [bin] akçe eder- bey‘-i bâtt-ı kat‘î ile bey‘ edip ol dahi iştirâ ve kabûl ve kabz eyledikden [sonra] semen-i mersûm yüz bin akçeyi yedinden istîfâ ve kabz, menzil-i mezbûr mülk-i müşterâsıdır hasbe-mâ yürîd mutasarrıf olsun dedikde gıbbe’t-tasdîk. Fi’l-yevmi’t-tâsi‘ ve’l-ışrîn min-Cumâdelâhire li-sene selâse ve sittin ve elf. Şuhûdü’l-hâl: Es-Seyyid Emrullah Efendi b. Halil, Mustafa b. Halil, Şa‘ban Efendi b. Hasan, el-Hâc Mahmud b. Abdullah, Mustafa Çelebi b. Hamza, ve gayruhum.