Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 55 Hüküm no: 7 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. el-Hâc Şükrullah’ın arsa ve tarlalarını sattığı Husûs-ı âti’l-beyânın mahallinde tahrîri iltimâs olunmağın küttâb-ı mahkeme fahrü’l-kuzât es-Seyyid Mehmed Efendi irsâl olunup ol dahi zeyl-i kitâbda isimleri mastûr olan Müslimîn ile mahmiye-i İstanbul’da Hoca Hayreddin Mahallesi’nde sâkin Abdi b. el-Hâc Şükrullah nâm kimesnenin menziline varıp akd-i meclis-i şer‘-i şerîf oldukda, mezbûr Abdi meclis-i mezbûrda li-ebeveyn karındaşı oğlu işbu bâ‘isü’l-kitâb Mehmed b. Murad nâm kimesne muvâcehesinde ikrâr [ve] i‘tirâf [edip] vilâyet-i Anadolu’da Kengiri [Çankırı] sancağında Kurşunlu kazâsına tâbi‘ Çam nâm karyede babam müteveffâ-i mezbûr Şükrullah’dan irs-i şer‘î ile intikāl edip bir tarafı Turgud b. Pîr Dede mülkü ve bir tarafı el-Hâc Şuayb mülkü ve bir [tarafı] Yar Ahmed mülkü ve bir tarafı tarîk-i âm ile mahdûd ve mümtâz olup mukaddemâ üzerinde beş bâb beyt olan arsa-yı hâliyemi mezbûr Mehmed’e tarafeynden îcâb ve kabûlü hâvî bey‘-i bâtt-ı şer‘î ile beş yüz akçeye bey‘ edip ol dahi iştirâ ve kabûl eyledikden sonra yine karye-i mezbûre sınırı dâhilinde vâki‘ babam müteveffâ-i mezbûr tasarrufunda olan hudûdları beynimizde ma‘lûm tarlaların dahi hakk-ı tasarrufunu sâhib-i arz ma‘rifetiyle mezbûr Mehmed’e bin beş yüz akçeye ferağ ve tefvîz ol dahi tefevvüz ve kabûl eyledikden sonra bedel-i ferağ olan bin beş yüz akçe ile semen-i merkūm beş yüz akçe ki cem‘an iki bin akçeyi mezbûrdan bi’t-tamam ahz u istîfâ edip arsa-yı mersûm ile mezkûr tarlaları mahallinde mutasarrıf-ı mezbûr Mehmed’i taslît eyledim dediğini mevlânâ-yı mezbûr mahallinde ketb ü tahrîr ve meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a kayd şüd. Fi’l-yevmi’t-tâsi‘ ve’l-ışrîn min-âhiri’l-Cumâdâ sene selâse ve sittin ve elf. Şuhûdü’l-hâl: el-Hâc Satılmış b. İbrahim, Debbâğ Mehmed b. Çalabverdi, Mehmed Beşe b. Şa‘ban, Ali b. Musa ve gayruhum.