Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 142 Hüküm no: 147 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras payının alındığı Mahmiye-i Galata mahallâtından Okçu Musa mahallesi sâkinelerinden olup bundan akdem vefât eden merhûme Fâtıma bt. Ahmed Reis nâm hâtunun vâlidesi ve vârisesi olan Mihri bt. Abdullah nâm hâtun meclis-i şer‘de müteveffât-ı mezbûrenin li eb karındaşı ve vârisi olan Mustafa b. Ahmed Reis nâm kimesnenin bimâ hüve tarîkü’s-sübût şer‘an vekâleti sâbite olan Receb b. İbrahim ve müteveffât-ı mezbûrenin li eb kız karındaşı ve vârisesi olan Rahime bt. Ahmed Reis nâm hâtunun nehc-i şer‘î üzre vekâleti sâbite olan el-Hâc İbrahim b. Nurullah nâm kimesneler mahzarlarında ikrâr-ı sahîh-i şer‘î edi[p] müteveffât-ı mezbûrenin cümle muhallefâtı ma‘rifet-i şer‘le füruht olunup ba‘de küll-i hesâb altı bin üç yüz elli akçe edip bana âid ve râci‘a olan südüs hisse-i şer‘iyye ki dört bin dört yüz on altı akçe etmeğin meblağ-ı mezbûru, mezbûrân Mustafa ve Rahime’nin müvekkilleri merkūmân Receb ve el-Hâc İbrahim yedlerinden bi’t-tamâm ve’l-kemâl ahz ü kabz edip husûs-ı mezbûra müte‘allik cemî‘-i da‘vâ ve mütâlebâtdan ve eymân ve muhâsamâtdan zimmetlerini ibrâ-i âm ile ibrâ ve iskāt-ı hak eyledim ba‘de’l-yevm benden asâleten ve vekâleten da‘vâ ve nizâ‘ sudûr [ve] zuhûr eder ise inde’l-hükkâm mesmû‘a ve makbûle olmaya dedikde mukırra-i mezbûrenin kelimât-ı meşrûhasını vekîlân-ı merkūmân Receb ve el-Hâc İbrahim mezbûre Mihri Hâtun’un vech-i meşrûh üzre olan ikrârını tasdîk ve tahkīk ettiklerinden sonra mâ vaka‘a kayd olundu. Tahrîren fi’l-yevmi’s-sânî min şehri Zilka‘deti’ş-şerîfe sene hamse ve elf. Şuhûd: Mehmed Çelebi b. Yusuf el-Mu‘arrif, İbrahim b. Nurullah, Hüsrev b. Abdullah, Mustafa b. Ali, el-Hâc Nurullah b. Hüseyin, Mehmed Çelebi b. Alâaddin el-İmâm, Derviş Çelebi el-İmâm ve gayruhüm