Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 142 Hüküm no: 148 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borca karşılık rehin iddiasının reddi Bundan akdem mahmiye-i Galata hâricinde kasaba-i Kasımpaşa mahallâtından Câmi‘ mahallesinde sâkin iken vefât eden merhûm ve mağfûrun leh Mehmed Çelebi b. el-Hâc Ali nâm kimesnenin veresesinden sulbî oğlu ve sagīr oğlu Hasan ve İsmihan nâm sagīrlerin vasiyy-i şer‘îsi olan Hüseyin Çelebi b. Mehmed Çelebi meclis-i şer‘a Dergâh-ı âlî çavuşlarından fahrü’l-emâsil ve’l-akrân es-Seyyid Abdi Çavuş b. es-Seyyid Ahmed nâm kimesneyi ihzâr ve mahzarında takrîr-i da‘vâ edip müteveffâ-yı mezbûr babam Mehmed Çelebi hâl-i hayâtında bir gümüşlü eyer ve bir yağmurluk ve bir tülbent börkü ve bir gümüşlü topuz ve bir gümüşlü licâm ve bir gümüş zincir ve bir yağmurluk kesesi bu zikr olunan esbâbları emânet vaz‘ etmişdir taleb ederim suâl olunsun dedikde gıbbe’s-suâl merkūm Abdi Çavuş cevâb verip fi’l-hakīka bu zikr olunan esbâblar bende vardır lâkin müteveffâ-yı mezbûrda on dört bin akçe hakkım vardı rehn-i şer‘î vaz‘ etmişdi dedikde mûmâ-ileyh Abdi Çavuş bu zikr olunan esbâbları deyni mukābelesinde rehin vaz‘ ettiğine beyyine taleb olundukda beyyine[den] âcizim ve beyyinem yoktur dediği kayd olundu. Tahrîren fî 7 şehri Şevvâl sene hamse ve elf. Şuhûd: Mustafa b. Şaban, Osman Çelebi b. Sefer, Feridun b. Abdullah, Ömer Çelebi b. Sefer, Ahmed Çelebi b. Ali, Hoca Çelebi b. Turgud ve gayruhüm