.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 241
Hüküm no: 293
Orijinal metin no: [44a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âişe Hatun’a yemin teklif olunduğu

Hüccet-i yemîn Mahmiye-i Galata dâhilinde vâki‘ el-Hâc A‘mâ mahallesi sâkinelerinden olup bundan akdem vefât eden merhûme Rûşen Hâtun bt. Abdullah nâm müteveffâtın min ciheti’l-usûbeti’n-nesebiyye vârisi oğlu oğlu Mehmed b. Mustafa nâm sagīre kıbel-i şer‘den vasî nasb olunan el-Hâc Hasan b. Abdullah el-Hammâmî nâm kimesne meclis-i şer‘-i şerîf-i lâzımü’t-tevkīrde işbu sâhibü’l-kitâb el-Hâc Hasan b. Abdullah ve kızı Âişe nâm hâtun muvâcehesinde takrîr-i da‘vâ edip müteveffât-ı merkūmenin mesfûre Âişe Hâtun ba‘zı esbâbını satmışdır. Hâlen suâl olunup mûcebin taleb ederin dedikde gıbbe’s-suâl ve’l-inkâr mersûme Âişe Hâtun’a müteveffât-ı mastûrenin esbâbını satmadığına ve sattırmadığına yemîn teklîf olunsun dedikde mezkûre Âişe Hâtun’a yemîn teklîf olunup vech-i meşrûh üzre yemîn billâhi aliyyi’l-azîm eyledikden sonra dahi mersûm sâlifü’z-zikr el-Hâc Hasan yedinden müteveffât-ı mezkûrenin mevcûd olan esbâbını ale’l-infirâd vesâyetim hasebiyle alıp kabz eyledim dedikde mukırr-ı merkūmun vech-i meşrûh üzre olan kelimâtını mastûrân el-Hâc Hasan ve kızı Âişe Hâtun bi’l-muvâcehe tasdîk ve bi’l-müşâfehe tahkīk ettikden sonra mâ hüve’l-vâki‘ alâ vukū‘ihî ketb ve terkīm olunup yed-i tâlibe vaz‘ olundu ki vakt-i hâcetde müzekkir-i mâ cerâ ola. Tahrîren fî evâili şehri Şa‘bâni’l-mu‘azzam sene sitte ve elf. Şuhûd: Hüdâverdi b. Abdullah, Ahmed Halîfe b. Abdullah, Sefer Halîfe b. el-İmâm, Hüsrev b. Abdullah, Mustafa b. Ramazan, Hüsrev b. Abdullah