.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 242
Hüküm no: 294
Orijinal metin no: [44a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


El-Hâc Himmet ve el-Hâc Ahmed’in, miras anlaşmazlığında Fâtıma bt. Abdullah’ın zimmetini ibrâ ettiği

Hüccet-i ibrâ Mahmiye-i Galata hâricinde vâki‘ Mustafa Ağa mahallesi sâkinlerinden olup Ahyolu nâm iskelede vefât eden Mahmud Reis b. Şaban nâm müteveffânın li eb ve üm karındaşları olan el-Hâc Himmet ve el-Hâc Ahmed b. Şaban nâm kimesneler asâleten meclis-i şer‘-i şerîf-i lâzımü’t-tevkīrde işbu sâhibetü’l-kitâb müteveffâ-yı mezbûrun zevce-i metrûkesi olan Fâtıma bt. Abdullah nâm hâtun muvâcehesinde takrîr-i kelâm ve ta‘bîr ani’l-merâm edip müteveffâ-yı mezbûrun muhallefâtı husûsunda mezkûre Fâtıma ile mâbeynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî mersûme Fâtıma Hâtun ile merhûm-ı mezbûrun muhallefâtı husûsunda bi vechin mine’l-vücûh ve sebebin mine’l-esbâb da‘vâ ve nizâ‘ımız kalmayıp zimmetini ibrâ-i âm ile ibrâ ve iskāt-ı tâm ile iskāt eyledik ba‘de’l-yevm husûs-ı mezbûra müte‘allik bizden veya vekîlimizden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dediklerinde mukırrân-ı mezkûrânın vech-i meşrûh üzre sâdır olan kelimâtını mersûme Fâtıma Hâtun vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ hüve’l-vâki‘ alâ vukū‘ihî ketb ve terkīm olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şa‘bâni’l-mu‘azzam sene sitte ve elf.


Şuhûdü’l-hâl: İbrahim Efendi b. Ali, Hüseyin Efendi b. Şaban el-Müsta‘id, Mustafa Reis b. Mehmed, Keyvan b. Abdullah, el-Hâc Ali b. Hüseyin, Yusuf b. Abdullah ve gayruhüm mine’l-hâzırîn