|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 244 Hüküm no: 297 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Câriyenin Fâtıma Hatun’un mülkü olduğu
Hüccet-i mülknâme-i câriye Mahmiye-i Galata hâricinde vâki‘ Mustafa Ağa mahallesi sâkinlerinden olup bundan akdem Ahyolu nâm iskelede vefât eden Mahmud Reis b. Şaban nâm müteveffânın li eb ve üm karındaşı ve vârisi olan el-Hâc Himmet b. Şaban nâm kimesne asâleten ve müteveffâ-yı mezbûrun sulbiye kızı Emine nâm sagīreye kıbel-i şer‘den vasî nasb olunup merhûmun li eb ve üm karındaşı el-Hâc Ahmed dahi vesâyeten ve asâleten meclis-i şer‘-i şerîf-i lâzımü’t-tevkīrde işbu sâhibetü’l-kitâb müteveffâ-yı mersûmun zevce-i metrûkesi olan Fâtıma bt. Abdullah nâm hâtun muvâcehesinde takrîr-i da‘vâ edip merhûm-ı mezbûrun ( ) el-asl Belkıs nâm sagīre mülk câriyesini mersûme Fâtıma benim mülkümdür deyû bizim vâzı‘ü’l-yed olmamıza mâni‘ olur suâl olunup mûcebin taleb ederiz dediklerinde gıbbe’s-suâl merkūme Fâtıma câriye-i mesfûreyi ben kendi malımla iştirâ edip mülk-i sarîhimdir deyû cevâb verip fi’l-vâki‘ kendi mâlıyla iştirâ eylediğine mezkûre Fâtıma’dan beyyine taleb olundukda udûl-i müslimînden Mehmed b. Beyti ve Ali b. Hüseyin nâm kimesneler meclis-i şer‘a li ecli’ş-şehâde hâzırân olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki fi’l-hakīka mersûme câriyeyi mastûra Fâtıma kendi mâlıyla bizim huzûrumuzda iki bin iki yüz akçeye iştirâ edip mülk-i sarîhi idiğine şâhidiz ve şehâdet dahi ederiz dediklerinde ba‘de ri‘âyeti şer‘âit-i kabûl şehâdetleri hayyiz-i kabûlde vâki‘ oldukdan sonra mersûme Fâtıma’ya câriye-i mastûreyi iştirâ eylediği iki bin iki yüz akçe müteveffâ-yı mezkûrun malı olmadığına yemîn teklîf olunsun dediklerinde mezbûre Fâtıma’ya yemîn teklîf olunup meblağ-ı merkūm iki bin akçenin bir sikke-i filorisinden gayrı müteveffâ-yı mersûmun malı olmadığına yemîn billâhi’l-aliyyi’l-azîm ettikden sonra câriye-i mersûme mastûre Fâtıma’nın malı idiğine hükm olunup mâ hüve’l-vâki‘ alâ vukū‘ihî ketb ü terkīm olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fi’t-târihi’l-mezbûr. Şuhûd: Es-Sâbikūn
|