.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 243
Hüküm no: 296
Orijinal metin no: [44b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hatun’un el-Hâc Himmet ve el-Hâc Ahmed adlı kardeşlerin zimmetlerini ibrâ ettiği

Hüccet-i ibrâ Mahmiye-i Galata hâricinde vâki‘ Mustafa Ağa mahallesi sâkinlerinden olup Ahyolu nâm iskelede vefât eden Mahmud Reis b. Şaban nâm müteveffânın zevce-i metrûkesi olan Fâtıma bt. Abdullah nâm hâtun müteveffâ-yı mezkûrun sulbiye kızı Emine nâm sagīreye kıbel-i şer‘den vasî olduğu haysiyetiyle vesâyeten ve asâleten meclis-i şer‘-i şerîf-i lâzımü’t-tevkīrde işbu sâhibü’l-kitâb müteveffâ-yı mersûmun li eb ve üm karındaşlar olan el-Hâc Himmet ve el-Hâc Ahmed ibney Şaban nâm kimesneler muvâcehesinde takrîr-i kelâm ve ta‘bîr ani’l-merâm edip müteveffâ-yı merkūmun bi hasebi’ş-şer‘-i şerîf isbât olunup zimmetine edâsı lâzım olan otuz dört bin akçe ve merhûm-ı mezbûr alâ tarîki’l-mudârebe kabz ve zabt edip ba‘de’l-vefât edâ olunan elli yedi bin dört yüz akçe ve bundan akdem resm-i kısmete ve techîz ve tekfînine ve sâir harc-ı ma‘kūlüne sarf olunan on dört bin yirmi akçe ki cem‘an yüz beş bin dört yüz yirmi akçe olur bundan mâ‘adâ merhûmun muhallefâtından vasîsi olduğum sagīre Emine’ye on beş bin akçe hisse-i şer‘iyye intikāl edip ve mahalle-i merkūmede vâki‘ inde’l-ahâlî ve’l-cîrân ma‘lûmetü’l-hudûd olan mülk menzilimin taraf-ı şimâlinde merhûm-ı mersûm binâ eylediği bir beyt-i ulvî üç bin akçe bahâya tutulup sümün hisseme tuta beyt-i mersûmu üç bin akçeye kabûl ve kabz edip sagīre-i merkūmeye intikāl eden on beş bin akçeyi ve sümün hissemi mezkûrân el-Hâc Himmet ve Ahmed yedinden bi’t-tamâm ve’l-kemâl alıp kabz eyleyip zimmetlerini asâlet ve vesâyetimiz hasebiyle ibrâ-i âm ile ibrâ ve iskāt-ı tâm ile iskāt eyledim merhûm-ı mersûmun muhallefâtı husûsunda bi vechin mine’l-vücûh ve sebebin mine’l-esbâb da‘vâ ve nizâ‘ım kalmadı ba‘de’l-yevm husûs-ı mezbûra müte‘allik benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırra-i mersûmenin vech-i meşrûh üzre sâdır olan kelimâtını mersûmân el-Hâc Himmet ve el-Hâc Ahmed vicâhen tasdîk ve şifâhen tahkīk ettikden sonra mâ hüve’l-vâki‘ alâ vukū‘ihi ketb ü terkīm olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şa‘bâni’l-mu‘azzam sene sitte ve elf. Şuhûd: Es-Sâbikūn