.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 246
Hüküm no: 300
Orijinal metin no: [45a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Evin Mustafa ve Rahime’ye ait olduğu

Mahmiye-i Galata hâricinde vâki‘ Mustafa Ağa mahallesi sâkinelerinden olup bundan akdem vefât eden merhûme Sâkine bt. Pîrî nâm hâtunun câriye-i mu‘takası olan Nâzenin bt. Abdullah ve diğer câriyesi Hümâ bt. Abdullah meclis-i şer‘-i şerîf-i lâzımü’t-tevkīrde müteveffât-ı mezbûrenin zevci olup bundan akdem vefât eden Ahmed Reis b. Abdullah nâm müteveffânın sulbî oğlu Mustafa ve sulbiye kızı Rahime nâm sagīrlerine kıbel-i şer‘den vasî nasb olunan Mahmud Reis b. Mehmed nâm kimesne muvâcehesinde takrîr-i da‘vâ edip müteveffât-ı mezkûre hâl-i hayâtında ve kemâl-i sıhhatinde mahalle-i mezbûrede vâki‘ bir tarafı Abdi Bey b. Abdullah mülkü ve bir tarafı Abdi Reis b. Ali mülkü ve bir tarafı merhûm-ı mezbûr Ahmed Reis’in sagīrlerine Mustafa ve Rahime’ye irs-i şer‘le intikāl eden menzili ve bir tarafı tarîk-i hâs ile mahdûd olan bir beyt-i süflî ve iki beyt-i ulvî ve bi’ri mâyı ve cüneyneyi ve kenîfi muhtevî olan mülk menzilinin süknâsını bize ve bizim evlâdımıza ve evlâd-ı evlâdımıza ve ba‘de’l-inkırâz vâkıfe-i merkūmenin zevci iken bundan akdem civâr-ı rahmet-i hayy-i kadîrde cây-gîr olan Ahmed Reis evlâdından hayâtda olanlar ve onların evlâd-ı evlâdına ve …? …? vakf eylemişdir, hâlen yedimizde vakıfnâme olup vasiyy-i mersûm Mahmud Reis menzil-i mezkûrda sâkin olmamıza mâni‘ olur suâl olunup mûcebini taleb ederiz dediklerinde gıbbe’s-suâl vasiyy-i mersûm Mahmud Reis cevâb verip eğerçi menzil-i mevsûf-ı mezkûrun arzı müteveffât-ı mastûre Sâkine Hâtun’undur, lâkin binâ müteveffâ-yı mesfûr Ahmed Reis’indir. Ahmed Reis vefâtından sonra mezkûrân Mustafa ve Rahime nâm sagīrlerine irs-i şer‘le intikāl edip hâlen merkūmânın mülk-i mevrûslarıdır dedikde fi’l-vâki‘ kaziyye minvâl-i meşrûh üzre olduğuna mezkûretân Nâzenin ve Hümâ vasiyy-i mersûmdan beyyine taleb eylediklerinde udûl-i müslimînden Çâker Reis b. Abdullah ve Abdi Bey b. Abdullah el-Cündî ve Ali Bey b. Abdullah ve Mustafa Bey b. Mehmed eş-şehîr bi Handânî Bey el-Cündî meclis-i şer‘-i şerîfe hâzırûn olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki fi’l-hakīka menzil-i mevsûf-ı mezbûrun arzı bir beyt-i süflî ile müteveffât-ı mezkûre Sâkine Hâtun’un olup lâkin beyt-i süflî harâba müşrif olmağla müteveffât-ı merkūme icâzesiyle zevci merhûm Ahmed Reis beyt-i süflîyi hedm edip bir beyt-i süflî ve iki beyt-i ulvî binâ eyleyip binâ için sarf eylediği meblağ Ahmed Reis’in kendi malı olduğuna şâhidiz şehâdet dahi ederiz dediklerinde alâ vechi’l-ihtimâm merhûm Ahmed Reis’in binâ eylediği büyût-ı selâsede zevcesi müteveffât-ı mersûme Fâtıma Hâtun’un alâkası olmadığına şâhidûn-ı mezkûrûna yemîn teklîf olunup şâhidûn-ı mersûmûn dahi ale’l-infirâd vech-i meşrûh üzre yemîn billâhi’l-aliyyi’l-azîm eylediklerinden sonra ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ olup menzil-i mezkûrun binâsı sagīrân-ı mersûmân Mustafa ve Rahime’nin bi hasebi’ş-şer‘ mülk-i mevrûsları idiğine hükm olunup mâ hüve’l-vâki‘ alâ vukū‘ihî ketb ve terkīm olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Şa‘bâni’l-mu‘azzam sene sitte ve elf.


Şuhûdü’l-hâl: El-Hâc Murad Halîfe b. Abdullah el-İmâm, İbrahim b. Ömer er-Râcil, Ali Bey b. Hasan, Mehmed Beşe b. Abdullah er-Râcil, Ahmed Halîfe b. Mustafa el-İmâm, Hüseyin b. Abdullah, Ali b. Hızır el-Müezzin, Mehmed Beşe b. Abdullah er-Râcil, Abdi Reis b. Ali, Mehmed b. Mustafa el-Muhzır ve gayruhüm mine’l-hâzırîn