.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 247
Hüküm no: 301
Orijinal metin no: [45a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Miras payının teslim edildiği

Mahmiye-i Galata ve Havâss-ı Kostantıniyye’de vâki‘ beytülmâl-i hâs emîni olup bundan akdem mahmiye-i mezbûre hâricinde vâki‘ Mustafa Ağa mahallesi sâkinelerinden olup bundan akdem vefât eden Sâkine Hâtun bt. Pîrî nâm hâtunun muhallefâtına vâzı‘ü’l-yed olan fahrü’l-akrân Mehmed Çavuş b. Abdullah’ın husûs-ı âti’z-zikri da‘vâya vekîli olup nehc-i şer‘î üzre vekâleti sâbite olan Mustafa Bey b. Abdullah nâm kimesne meclis-i şer‘-i şerîfde işbu sâhibü’l-kitâb müteveffât-ı mezkûre Sâkine Hâtun’un zevci iken bundan akdem civâr-ı rahmet-i hayy-i kadîrde cây-gîr olan Ahmed Reis b. Abdullah nâm müteveffânın sulbî oğlu Mustafa ve sulbiye kızı Rahime sagīrlerine kıbel-i şer‘den vasî nasb olunan Mahmud Reis b. Mehmed nâm kimesne muvâcehesinde takrîr-i da‘vâ edip merhûme Sâkine Hâtun’a zevci Ahmed Reis’in cemî‘-i muhallefâtından [45b] bi hasebi’ş-şer‘-i şerîf sümün hissesi on sekiz bin akçe edip vasiyy-i mezbûr meblağ-ı merkūm on sekiz bin akçe dahi merhûme Sâkine Hâtun’a ne tarîkle edâ eylediği suâl olunup mûcebini taleb ederin dedikde gıbbe’s-suâl vasiyy-i merkūm Mahmud Reis cevâb verip meblağ-ı mersûm on sekiz bin akçe sümün hissesi mukābelesinde on iki bin akçe bahâya Rusiyyetü’l-asl Nazeni nâm bir câriye ve altı bin akçe dahi kayık bahâsından cem‘an on sekiz bin akçe olur meblağ-ı merkūm on sekiz bin akçeyi mersûme Sâkine Hâtun’a hâl-i hayâtında teslîm eyledim ol dahi tesellüm ve kabz etmişdir dedikde fi’l-vâki‘ kaziyye minvâl-i meşrûh üzre olduğunu musaddık beyyine taleb olundukda udûl-i müslimînden Handânî Bey b. Mehmed el-Cündî ve Abdi Reis b. Ahmed ve Çâker Reis b. Abdullah ve Abdi Bey b. Abdullah el-Cündî nâm kimesneler meclis-i şer‘-i şerîfe li ecli’ş-şehâde hâzırûn olup gıbbe’l-istişhâdi’ş-şer‘î mezkûr Mahmud Reis’in makāline mutâbık ve kelâmına muvâfık şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ oldukdan sonra mâ vaka‘a alâ vukū‘ihî ketb ve terkīm olunup yed-i tâlibe vaz‘ olundu. Tahrîren fî evâsıtı şehri Şa‘bâni’l-mu‘azzam sene sitte ve elf. Şuhûd: Es-Sâbikūn fi’s-sakki’l-ûlâ