|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 248 Hüküm no: 303 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kamil Efendi’nin beytülmâlden alacağını tahsil edip ibrâ ettiği
Beytülmâl yüzüne ibrâ-i âm Mahmiye-i Galata hâricinde vâki‘ Mustafa Ağa mahallesi sâkinelerinden olup bundan akdem vefât eden Sâkine Hâtun bt. Pîrî nâm müteveffâtın zevc-i metrûkü olan fahrü’l-kuzât Kâmil Efendi b. Hamid tarafından husûs-ı âti’z-zikri da‘vâya ve kabza ve ibrâya vekîl olup vekâleti fahrü’l-müderrisîn İbrahim Efendi b. Şaban ve Ali b. Hacı nâm kimesneler şehâdetleriyle sâbite olan mefharü’l-mülâzımîn el-Hâc Eyüb Efendi b. Hamid nâm kimesne meclis-i şer‘-i şerîf-i lâzımü’t-tevkīrde işbu bâ‘isü’l-kitâb mahmiye-i mezbûre ve Havâss-ı Kostantıniyye’de vâki‘ beytülmâl-i hâs emîni olan fahrü’l-ümenâ Mehmed Çavuş b. Abdullah’ın husûs-ı âti’z-zikri tasdîka vekîli olup nehc-i şer‘î üzre vekâleti sâbite olan Mustafa Bey b. Abdullah nâm kimesne muvâcehesinde ikrâr-ı sahîh-i şer‘î ve i‘tirâf-ı mer‘î kılıp müteveffât-ı mersûme Sâkine Hâtun’un muhallefâtından füruht olunan esbâb ve câriye bahâsından hâsıl olan meblağdan bi hasebi’ş-şer‘ müvekkilim mesfûr Kâmil Efendi’ye âid ve râci‘ olan nısf hissesini vekâletim hasebiyle bi’t-tamâm ve’l-kemâl alıp kabz edip emîn-i mersûm Mehmed Çavuş’un zimmetini ibrâ-i âm ile ibrâ ve iskāt-ı tâm ile iskāt eyledim dedikde mukırr-ı merkūmun vech-i meşrûh üzre olan kelimâtını mukarrun lehü’l-mersûm vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Şa‘bâni’l-mu‘azzam sene sitte ve elf. Şuhûd: Fahrü’l-mülâzımîn Yusuf Çelebi b. Mustafa, Hüseyin Efendi b. Şaban el-Müsta‘id, Mustafa b. Ramazan, Receb b. Abdullah, Abdülkādir Halîfe b. Hacı
|