.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 258
Hüküm no: 316
Orijinal metin no: [47a-2, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Zamâne Hatun’un Rus asıllı câriyesini azat ettiği

Itâknâme-i Zamâne Mehmed Reis b. Mansur ve Memi b. Ali nâm kimesneler meclis-i şer‘-i şerîfe hâzırân olup, dâhil-i mahrûse-i Galata mahallâtından Câmi‘-i Kebîr mahallesinde sâkin iken fevt olan merhûme Zamâne Hâtun bt. Abdullah’ın zevci ve vârisi olan, mahrûse-i Galata gümrük kapısında bevvâb olan Memişah b. Abdullah mahzarında, orta boylu, sarışın, gök gözlü, sol kaşı üzerinde eser-i cerh bulunan Rusiyyetü’l-asl hâmiletü hâze’l-kitâb Zamâne bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffât-ı mezkûre Zamâne Hâtun, hâl-i nefâz-ı tasarrufât-ı şer‘iyyesi ve sıhhat-i teberru‘ât-ı mer‘iyyesinde, taht-ı mülkünde bulunan Zamâne nâm câriye-i mevsûfe-i mezkûresini hasbeten lillâhi’l-aliyyi’l-azîm ve taleben li merzâti rabbihi’l-kerîm âzâd ve tahrîr etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince müdde‘iye-i mezbûrenin müteveffât-ı mastûrenin malından ıtkına hükm etti. Câriye-i merkūme bu sûrette sâir harâir-i asliyyât-ı mükellefât gibi hürre oldu. Cerâ zâlike ve hurrire fî evâhiri şehri Şa‘bâni’l-mu‘azzam sene sitte ve elf. Şuhûd: Mehmed Halîfe b. el-İmâm, Derviş Halîfe el-Müezzin, Pervâne b. Abdullah, Osman b. Ali, Mustafa b. Ali, Mehmed b. Yusuf