|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 258 Hüküm no: 317 Orijinal metin no: [47a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vasînin vekîl atadığı
Beşiktaş’da vâki‘ Ekmekçibaşı mahallesi sâkinlerinden olup bundan akdem vefât eden merhûm İsa Bey b. Ahmed nâm müteveffânın sulbî oğlu İsa nâm sagīre vasiyy-i muhtârı olan Mehmed Bey b. Ahmed nâm kimesne meclis-i şer‘-i şerîf-i lâzımü’t-tevkīrde işbu bâ‘isü’l-kitâb Mustafa b. Mehmed nâm kimesne muvâcehesinde takrîr-i kelâm ve ta‘bîr ani’l-merâm edip mersûm Mustafa’yı vesâyetime müte‘allik olan umûra ve ona mübtenî muhâsama ve mürâfa‘adan vâki‘ olan da‘vâya vekîl ve kāimmakām nasb eyledim dedikde merkūm Mustafa dahi vekâlet-i mesfûreyi bi’l-muvâcehe kabûl ve ta‘ahhüd ve iltizâm ettikden sonra hakīkat-i hâl gıbbe’t-taleb ketb ve terkīm olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fi’t-târihi’l-mezbûr. Şuhûd: Abdi Reis b. Ali, el-Hâc Hasan b. Abdullah, Mustafa b. Ali, Sinan Efendi b. Bâli, Mehmed b. Yusuf, Hüsrev b. Abdullah
|