.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 260
Hüküm no: 321
Orijinal metin no: [47b-3, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Bey Vakfı’nın Mahmud Halife’de alacağı olduğu

Hüccet-isbât-ı deyn Udûlden bevvâb-ı sultânî Mehmed Bey b. Abdullah, Ali b. Hamza, el-Hâc Hüseyin b. Ali ve el-Hâc Abdurrahman b. Abdülhay nâm kimesneler meclis-i şer‘-i şerîfe hâzırûn olup, bundan akdem hâric-i mahrûse-i Galata mahallâtından Muhyiddin Efendi mahallesinde vefât eden merhûm Mahmud Halîfe b. Şehsüvar’ın Osman, Ali, Âişe ve Rahime nâm evlâd-ı sıgārına kıbel-i şer‘den mansûb vasî olan Hüsrev b. Abdullah nâm vasî mahzarında ve merhûm-ı mezbûrun oğlu ve vârisi Mustafa mahzarında ve merhûm-ı mersûmun zevcesi ve vârisesi olan Mihman bt. Sefer mahzarında, merhûm Mehmed Bey vakfı’na mütevellî olan el-Hâc Mahmud Halîfe b. Muharrem’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mastûr, hâl-i hayâtı ve kemâl-i akl ve sıhhatinde bizim yanımızda ve katımızda zimmetinde vakf-ı mezbûr malından yedi bin akçe ve beynlerinde ma‘lûm murâbaha-i şer‘iyye cihetinden lâzımü’l-edâ ve vâcibü’l-kazâ üç yüz eli akçe deyni olduğunu ikrâr ve i‘tirâf etti. Müdde‘î-i mezbûra meblağ-ı merkūmu küllen veya ba‘zan kendisinden veya vekîlinden almadığına, bi vechin mine’l-vücûh zimmetini ibrâ etmediğine dâir yemîn verilmesinden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra hâkim-i askerî, meblağ-ı mesfûrun müdde‘î-i mesfûra müteveffâ-yı merhûmun muhallefâtından edâ edilmesine hükm etti. Cerâ zâlike ve hurrire fî evâili şehri Ramazâni’l-mübârek li sene sitte ve elf. Şuhûd: Yusuf Bey b. Abdullah el-Cündî, Mehmed Bey b. Abdullah el-Bevvâbü’s-sultânî, Mustafa b. Ramazan, Hüsrev b. Abdullah, Mustafa b. Ali, Mehmed b. Yusuf