.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 260
Hüküm no: 320
Orijinal metin no: [47b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mudârebeden kaynaklanan alacak hakkına delil gösterilen hüccetin doğru olduğu

Hüccet-i isbât-ı mazmûn Kasaba-i Kasımpaşa mahallâtından Hoca Surûr[î] mahallesi sâkinlerinden Mehmed b. Ahmed nâm kimesne mahmiye-i Galata hâricinde vâki‘ Mustafa Ağa mahallesi sâkinlerinden olup bundan akdem vefât eden merhûm Mahmud Reis b. Şaban nâm müteveffânın sulbiye kızı Emine nâm sagīrenin kıbel-i şer‘den vasîsi olan el-Hâc Ahmed b. Şaban nâm kimesneyi meclis-i şer‘-i şerîf-i şâmihü’l-bünyân ve mahfil-i dîn-i münîf-i râsihü’l-erkâna ihzâr ve mahzarında takrîr-i da‘vâ edip müteveffâ-yı mezbûrun zimmetinde alâ tarîki’l-mudârebe dört bin fıddî akçe hakkım olup meblağ-ı merkūm dört bin akçeyi merhûm-ı mezbûrun zimmetinde bâkīdir kaziyye minvâl-i meşrûh üzre olduğunu musaddık mukaddemâ mahmiye-i mezbûrede kassâm-ı askerî olan mevlânâ Muharrem b. Hüseyin imzâsıyla mümzâ ve hatemi ile mahtûm ve sene bin beş Şa‘bânü’l-mu‘azzamı’nın evâhiriyle müverraha yedimde hüccet-i şer‘iyyem vardır mûcebiyle merhûm-ı mezkûrun muhallefâtından hakkım taleb ederin dedikde gıbbe’s-suâl vasiyy-i mersûm bi’l-külliyye inkâr ile cevâb vericek müdde‘î-i mezkûrun da‘vâsına ve yedinde olan hüccet-i mezbûre zeylinde mastûretü’l-esâmî olan kimesnelerden mazmûn-ı hüccete beyyine taleb olundukda udûl-i müslimînden Muslihiddin b. Abdullah el-Bezzâzistânî ve Yusuf b. Musa nâm kimesneler li ecli’ş-şehâde meclis-i şer‘-i şerîfe hâzırân olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki fi’l-hakīka müdde‘î-i mesfûr Mehmed meblağ-ı mersûm dört bin akçeyi da‘vâ ettikde Mezid b. Said ve Musa b. Yusuf nâm kimesneler meblağ-ı mezkûr dört bin akçenin aslına şehâdet-i şer‘iyye ettiklerinden sonra hüccet-i mesfûre müşârün-ileyh Muharrem Efendi zamânında vasiyy-i mesfûr muvâcehesinde ketb olunmuşdur deyû edâ-i şehâdet-i şer‘iyye ettiklerinde şâhidân-ı mezbûrân şehâdetleri ba‘de’t-ta‘dîl ve’t-tezkiyye şehâdetleri hayyiz-i kabûlde vâki‘ olup meblağ-ı merkūm dört bin akçeyi merhûm-ı mezbûrun muhallefâtından hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî gurreti şehri Ramazâni’l-mübârek sene sitte ve elf. Şuhûd: Es-Sâbikūn