|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 263 Hüküm no: 326 Orijinal metin no: [48a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yeni vasînin eski vasîyi ibrâ ettiği
Kasaba-i Kasımpaşa’da vâki‘ Cum‘a mahallesi sâkinlerinden olup bundan akdem vefât eden merhûme Fahri Hâtun bt. Ali Bey nâm müteveffânın li eb ve üm kız karındaşı olan Hayri bt. Ali Bey nâm sagīrenin ve merhûme-i mezbûrenin vâlidesi olup kıbel-i şer‘den vasiyye nasb olunan Kamer bt. Abdullah nâm hâtun meclis-i şer‘-i şerîfde işbu sâhibü’l-kitâb bundan akdem kıbel-i şer‘den sagīre-i mezkûrenin vasîsi olan Mustafa b. Mehmed nâm kimesne muvâcehesinde takrîr-i kelâm edip müteveffât-ı mersûmeden ber mûceb-i defter kızım merhûme Fahri’den kendime âid ve râci‘ olan dört bin dört yüz on dört akçe hisse-i şer‘iyyemi ve kızım sagīre-i mersûmenin ber mûceb-i defter âid ve râci‘ olan on bir bin otuz yedi akçe hisse-i şer‘iyyesini dahi hâlen vasîsi olduğum haysiyetiyle vasiyy-i atîk yedinden bi’t-tamâm ve’l-kemâl alıp kabz eyledim dedikde mukırra-i merkūmenin vech-i meşrûh üzre olan kelimâtını mezkûr Mustafa vicâhen tasdîk ve şifâhen tahkīk ettikden sonra mâ vaka‘a alâ vukū‘ihî ketb olunup yed-i tâlibine vaz‘ olundu. Tahrîren fi’t-târihi’l-mezbûr. Şuhûd: Es-Sâbikūn
|