.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 264
Hüküm no: 327
Orijinal metin no: [48a-4, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Bey Vakfı’nın Mahmud Halife’de alacağı olduğu

Hüccet-i isbât-ı deyn Udûlden Mehmed Bey b. Abdullah ve Ali b. Hamza ve el-Hâc Hüseyin b. Ali ve el-Hâc Abdurrahman b. Abdülhay nâm kimesneler meclis-i şer‘-i şerîfe hâzırûn olup hâric-i mahrûse-i Galata mahallâtından Muhyiddin Efendi mahallesinde bundan akdem vefât eden Mahmud Halîfe b. Şehsüvar’ın Osman, Ali, Âişe ve Rahime nâm evlâd-ı sıgārına kıbel-i şer‘den mansûb vasî olan Hüsrev b. Abdullah nâm vasî mahzarında ve merhûm-ı mezbûrun Mustafa nâm oğlu ve vârisi mahzarında ve merhûm-ı mersûmun zevcesi ve vârisi Mihman bt. Sefer nâm hâtun mahzarında, merhûm Mehmed Bey vakfı’na mütevellî olan hâmil-i hâze’l-kitâb el-Hâc Mahmud Halîfe b. Muharrem’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mastûr hâl-i hayâtı ve kemâl-i akl ve sıhhatinde bizim yanımızda ve katımızda müdde‘î-i merkūma vakf-ı mezbûr malından râyicü’l-vakt yedi bin akçe ve beynlerinde ma‘lûm murâbaha-i şer‘iyyeden üç yüz elli akçe lâzımü’l-edâ ve vâcibü’l-kazâ deyni olduğunu ikrâr ve i‘tirâf etti. Müdde‘î-i mezbûra meblağ-ı merkūmu kısmen veya tamâmen kendisinden veya vekîlinden almadığına, bi vechin mine’l-vücûh zimmetini ibrâ etmediğine dâir yemîn verilmesinden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra hâkim-i askerî, şehâdetleri mûcebince meblağ-ı merkūmun müteveffâ-yı mezbûrun muhallefâtından müdde‘î-i mersûma ödenmesine hükm etti. Cerâ zâlike ve hurrire fî evâili şehri Ramazâni’l-mübârek min şühûri sene sitte ve elf. Şuhûd: Yusuf Bey b. Abdullah el-Cündî, Mehmed Bey b. Abdullah, Mustafa b. Ramazan ve Hüsrev b. Abdullah ve Mustafa b. Yusuf, Mehmed b. Yusuf Derkenâr: Tekrâr olmuşdur.