|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 266 Hüküm no: 331 Orijinal metin no: [48b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Binâ ve ağaçların Mustafa’ya ait olduğu
Mahmiye-i Galata ve Havâss-ı Kostantıniyye’de beytülmâl emîni olup mahmiye-i mezbûre müzâfâtından kasaba-i Beşiktaş’da vâki‘ Sinan Paşa Câmi‘i mahallesi sâkinlerinden olup bundan akdem vefât eden merhûm Hürrem b. Abdullah nâm kimesnenin muhallefâtına vâzı‘ü’l-yed olan Mehmed Çavuş b. Abdullah nâm kimesne meclis-i şer‘-i şerîfde işbu sâhibü’l-kitâb Mustafa Çelebi b. Hemdem Kethüdâ nâm kimesne muvâcehesinde takrîr-i da‘vâ edip müteveffâ-yı mezbûr Hürrem’in mahalle-i mersûmede vâki‘ bir tarafı Murad Bey b. Abdullah ve bir tarafı Mütevellî Abdi Çelebi mülklerine ve iki tarafı tarîk-i hâs ve tarîk-i âma müntehî Derviş Efendi vakfı üzerinde kendi mâlıyla binâ eylediği tahtânî ve fevkānî üç bâb evleri ve matbahı ve kayıkhâneyi ve limanı ve kayıkhâne üzerinde tahtadan iki bâb odayı ve bir çeşmeyi ve ayazma nâm pınarı ve sâlifü’z-zikr Abdi Çelebi tarafındaki hadde muttasıl bir bâb tahtânî evi ve bahçede kendi mâlıyla gars ettiği usûl-i eşcâr-ı müsmireyi ve gayr-ı müsmireyi emânetim hasebiyle zabt ettirmede merkūm Mustafa nizâ‘ eder suâl olunup mûcibini taleb ederin dedikde gıbbe’s-suâl mersûm Mustafa cevâb verip ebniye-i mezbûreyi ve eşcâr-ı mesfûreyi merhûm-ı mezbûr Hürrem ile hâl-i hayâtında ve kemâl-i sıhhatinde zevcesi Gülizar bt. Abdullah’dan otuz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen kılmışdır hâlen kaziyye minvâl-i meşrûh üzre olduğu[nu] müsaddık yedimde mukaddemâ mahmiye-i mezbûrede kâtib-i şer‘ olan mevlânâ Ahmed Efendi b. Mehmed imzâsıyla mümzâ ve sene sitte ve elf Safer-i muzafferinin evâiliyle müverraha hüccet-i şer‘iyyem vardır deyû hüccet ibrâz edip fi’l-hakīka hüccet-i mezbûreye nazar olundukda mezkûr Mustafa’nın takrîrine mutâbık bulunup hüccet-i mersûme mazmûnuna beyyine taleb olundukda zeyl-i hüccetde mastûretü’l-esâmî olan kimesnelerden fahrü’l-akrân Mustafa Çavuş b. Ali ve Derviş b. Ali nâm kimesneler li ecli’ş-şehâde meclis-i şer‘-i şerîfe hâzırân olup gıbbe’l-istişhâdi’ş-şer‘iyye şöyle edâ-i şehâdet-i şer‘iyye eylediler ki fi’l-vâki‘ merhûm Hürrem’in hâl-i hayâtında ve kemâl-i sıhhatinde zevcesi Gülizar bt. Abdullah nâm hâtunuyla ber vech-i iştirâk binâ eyledikleri ebniye-i mezbûreyi ve eşcâr-ı mesfûreyi merkūm Mustafa otuz bin akçeye bey‘-i bâtt-ı sahîh-i şer‘î bey‘ edip kabz-ı semen-i merkūm ve teslîm-i mebî‘-i mersûm kılmışlardır husûs-ı mezbûreye şâhidiz ve şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ oldukdan sonra ebniye-i mezkûre ve eşcâr-ı mastûre mezbûr Mustafa’nın mülk-i müşterâsı olduğuna hükm olunup mâ vaka‘a alâ vukū‘ihî kayd olunup yed-i tâlibe vaz‘ olundu. Tahrîren fî evâili şehri Ramazâni’l-mübârek sene sitte ve elf. Şuhûd: Mehmed Bey b. Abdullah, Hasan Bey b. Abdullah, Hüseyin Çavuş b. Abdurrahman, Mustafa b. Ramazan ve gayruhüm Derkenâr : Hüccet-i mezbûreyi Kazasker Efendi imzâ etmişdir.
|