.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 265
Hüküm no: 330
Orijinal metin no: [48b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Odabaşı Mehmed Beşe’nin vârislere mallarını verdiği

Mahmiye-i Galata hâricinde vâki‘ Müeyyedzâde mahallesi sâkinlerinden olup otuz altıncı bölükde zümre-i yeniçeriyândan bundan akdem vefât eden merhûm Yahya Beşe b. Abdullah nâm müteveffânın sulbî oğlu Hasan nâm sagīrin vâlidesi olup sagīr-i mezbûr Hasan’ın li eb ve üm kız karındaşı olan Havva nâm sagīrenin kıbel-i şer‘den vasîsi olan Cinâne bt. Hasan nâm hâtun asâleten ve vesâyeten meclis-i şer‘-i şerîfde işbu sâhibü’l-kitâb zümre-i yeniçeriyândan otuz altıncı bölükde odabaşı olan Mehmed Beşe b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edip merhûm Yahya Beşe vefât eyledikde bi hasebi’ş-şer‘i’ş-şerîf oğlu mezbûr Hasan nâm sagīre altmış üç aded guruş-ı kebîr ve yüz yirmi sekiz aded sikke-i hasene ve otuz beş akçe intikāl eyleyip merhûm Yahya Beşe’nin odabaşısı olan merkūm Mehmed Beşe zabt eylemişdi el-hâletü hâzihî mersûm Hasan nâm sagīr dahi vefât edip meblağ-ı merkūm altmış üç aded guruş ve yüz on sekiz aded sikke-i hasene ve otuz beş akçe bâlâda zikr olunan vârislerine intikāl eylemeğin vesâyet ve asâletimiz hasebiyle meblağ-ı merkūm altmış üç aded guruş ve yüz on sekiz aded sikke-i haseneyi ve otuz beş akçeyi mezkûr odabaşı Mehmed Beşe yedinden bi’t-tamâm ve’l-kemâl alıp kabz eyledik ba‘de’l-yevm meblağ-ı merkūmdan mezkûr odabaşının zimmetinde bir akçe ve bir habbe kalmadı dediklerinde mukırrûn-ı mezkûrûnun vech-i meşrûh üzre olan kelimâtını mezbûr odabaşı Mehmed Beşe bi’l-muvâcehe tasdîk ve bi’l-müşâfehe tahkīk ettikden sonra mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Ramazâni’l-mübârek sene sitte ve elf. Şuhûd: Mehmed Beşe b. Abdullah er-Râcil, Ahmed Beşe b. Abdullah er-Râcil, Sefer Beşe b. Bâli er-Râcil, Yusuf b. Abdullah, el-Hâc Murad b. Abdullah