.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 270
Hüküm no: 337
Orijinal metin no: [49b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Bey’in Ahmed Çavuş’ta alacağı olduğu

Ebnâ-i sipâhiyândan Mustafa Bey b. Abdullah nâm cündî meclis-i şer‘-i şerîf-i lâzımü’t-tevkīrde bundan akdem vefât eden merhûm Ahmed Çavuş b. Mustafa nâm kimesnenin sulbî oğulları Mehmed ve Mustafa nâm sagīrlere vasiyy-i muhtâr olan fahrü’l-akrân Ali Çelebi b. Nasuh Kethüdâ nâm kimesne muvâcehesinde takrîr-i da‘vâ edip müteveffâ-yı mezbûr Ahmed Çavuş’da cihet-i karzdan bin guruş ve yüz guruş dahi çuka bahâsından cem‘an bin yüz guruş hakkım var idi guruş-ı merkūmdan hâl-i hayâtında dört yüz guruş alıp merhûm Ahmed Çavuş’a yedi bin akçe dahi verdim bâkī Ahmed Çavuş zimmetinde yedi yüz guruş ve yedi bin akçe hakkım vardır suâl olunup muhallefâtından taleb ederim dedikde gıbbe’s-suâl vasiyy-i mezbûr bi’l-külliyye inkâr edip müdde‘î-i merkūmdan beyyine taleb olundukda kaziyye minvâl-i meşrûh üzre olduğunu müsaddık yedimde mukaddemâ mahmiye-i Kostantıniyye’de Mahmud Paşa mahkemesinde nâibü’ş-şer‘ olan mevlânâ Mustafa Efendi b. Halil imzâsıyla mümzâ hüccet-i şer‘iyyem dahi vardır deyû hüccet ibrâz edip fi’l-hakīka hüccet-i mezbûreye nazar olundukda müdde‘î-i mersûmun takrîrine mutâbık olup hüccet-i mezkûre mazmûnuna beyyine taleb olundukda zeyl-i hüccetde mastûrü’l-esâmî olan kimesnelerden Mustafa Bey b. Abdullah ve Hüseyin Bey b. Hürrem nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd eş-şer‘î şöyle edâ-i şehâdet-i şer‘iyye eylediler ki fi’l-vâki‘ müdde‘î-i mesfûr merhûm-ı mezbûr Ahmed Çavuş’a bin guruş cihet-i karzdan ve yüz guruş dahi çuka bahâsından cem‘an bin yüz guruş verip dört yüz guruşunu hâl-i hayâtında Ahmed Çavuş’dan alıp yedi bin akçe dahi vermişdi hâlen mesfûr Ahmed Çavuş’un yedi yüz guruş ve yedi bin akçe zimmetinde bâkīdir husûs-ı mezbûra şâhidiz ve şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâki‘ oldukdan sonra merhûm-ı mezbûrun muhallefâtından edâsına hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Ramazâni’l-mübârek sene sitte ve elf. Şuhûd: Hüsrev b. Abdullah ve Mustafa b. Ramazan ve Mehmed b. Yusuf, Bâli b. Derviş el-Kâtib, Mehmed Bey b. Abdullah el-Cündî, diğer Mehmed Bey b. (…)