.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 271
Hüküm no: 338
Orijinal metin no: [49b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Canfeda Hatun’un, kızına ait miras payını Piyâle Bey’den teslim aldığı

Mahmiye-i Galata hâricinde vâki‘ Bereketoğlu mahallesi sâkinlerinden olup bundan akdem vefât eden merhûm Kara Süleyman b. Cafer nâm müteveffânın sulbiye kızı Kerime nâm sagīrenin kıbel-i şer‘den vasî nasb olunup ve vâlidesi olan Canfeda bt. Abdullah nâm hâtun meclis-i şer‘de işbu sâhibü’l-kitâb Piyâle Bey b. Abdullah muvâcehesinde takrîr-i kelâm edip müteveffâ-yı mezbûr Kara Süleyman’ın muhallefâtından sulbiye kızı sagīre-i mezbûre Kerime’ye irsle intikāl eden hisse-i şer‘iyyesinden mezbûr Piyâle sagīre-i merkūmeye nâzır olduğu haysiyetiyle otuz beş bin akçe kabz etmişdi el-hâletü hâzihî meblağ-ı merkūm otuz beş bin akçeyi vesâyetim hasebiyle bi’t-tamâm ve’l-kemâl alıp kızım mezbûre Kerime’nin cihâzına harc ve sarf eyledim dedikde mukırra-i merkūmenin vech-i meşrûh [üzre] olan kelimâtını mezbûr Piyâle Bey bi’l-muvâcehe tasdîk ve bi’l-müşâfehe tahkīk ettikden sonra mâ vaka‘a kayd olundu. Tahrîren fî evâili şehri Ramazâni’l-mübârek sene sitte ve elf. Şuhûd: Şükür b. Ali, Hasan b. Abdullah, İdris b. Yusuf, Mustafa b. Ramazan, Hüsrev b. Abdullah, Mehmed b. Yusuf, Muharrem b. Mustafa