|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 272 Hüküm no: 340 Orijinal metin no: [49b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hümâ Hatun’un ödünçten kaynaklanan borcunu Mahmud Reis’e ödediği
Mahmiye-i Galata hâricinde vâki‘ Mustafa Ağa mahallesi sâkinlerinden olup bundan akdem vefât eden merhûme Sâkine Hâtun bt. Pîrî nâm müteveffâtın câriye-i mu‘takası olan Hümâ bt. Abdullah nâm hâtun mahfil-i kazâda işbu bâ‘isü’l-kitâb merhûme-i mezbûre Sâkine Hâtun’un zevci olup vefât eden merhûm Ahmed Reis b. Abdullah nâm müteveffânın sulbî oğlu Mustafa ve sulbiye kızı Rahime nâm sagīrlerine kıbel-i şer‘den vasî nasb olunan Mahmud Reis b. Mehmed nâm kimesne muvâcehesinde takrîr-i kelâm edip vasiyy-i mersûm Mahmud Reis’den bundan esbak alâ tarîki’l-karz iki bin nakid râyic fi’l-vakt akçe alıp meblağ-ı merkūm iki bin akçeyi merkūm Mahmud Reis’e teslîmde mâbeynimizde münâza‘ât-ı kesîre vâki‘ olmuş idi el-hâletü hâzihî meblağ-ı mersûm iki bin akçeyi mezbûr Mahmud Reis’e teslîm edip beynimizde da‘vâ ve nizâ‘ kalmadı ba‘de’l-yevm husûs-ı mezbûra müte‘allik benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle [ol]maya dedikde mukırra-i merkūmenin vech-i meşrûh üzre olan kelimâtını mezkûr Mahmud Reis vicâhen tasdîk ettikden sonra mâ vaka‘a kayd olundu. Tahrîren fî evâsıtı [şehri Ra]mazâni’l-mübârek sene sitte ve elf. Şuhûd: Yusuf Bey b. Abdullah, Receb Bey b. İsmail, Hasan Çelebi b. Mehmed, Hüsrev b. Abdullah, Mustafa b. Receb
|