|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 278 Hüküm no: 350 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Ahmed’in mudârebeden dolayı Mahmud Reis’te alacağı olduğu
Kasımpaşa mahallâtından Hoca Surûrî mahallesi sâkinlerinden Mehmed b. Ahmed nâm kimesne mahmiye-i Galata hâricinde vâki‘ Mustafa Ağa mahallesi sâkinlerinden olup bundan akdem vefât eden merhûm Mahmud Reis b. Şaban nâm müteveffânın sulbiye kızı Emine nâm sagīrenin kıbel-i şer‘den vasîsi olan el-Hâc Ahmed b. Şaban nâm kimesneyi meclis-i şer‘-i şerîfe ihzâr ve mahzarında takrîr-i da‘vâ edip müteveffâ-yı mezbûrun zimmetinde alâ tarîki’l-mudârebe dört bin fıddî akçe hakkım olup meblağ-ı merkūm dört bin akçe merhûm-ı mezbûrun zimmetinde bâkīdir kaziyye minvâl-i meşrûh üzre olduğunu musaddık mukaddemâ mahmiye-i mezbûrede askerî kassâmı olan mevlânâ Muharrem Efendi b. Hüseyin imzâsıyla mümzâ ve hatemi ile mahtûm ve sene bin beş Şa‘bâni’l-mu‘azzamının evâhiriyle müverraha yedimde hüccet-i şer‘iyye vardır mûcebiyle merhûm-ı mersûmun muhallefâtından hakkım taleb ederin dedikde gıbbe’s-suâl vasiyy-i mezbûr bi’l-külliyye inkâr ile cevâb vericek müdde‘î-i mezkûrun da‘vâsına ve yedinde olan hüccet-i mezbûre zeylinde mastûretü’l-esâmî olan kimesnelerden mazmûn-ı hüccete beyyine taleb olundukda udûl-i müslimînden Muslihiddin b. Abdullah el-Bezzâzistânî ve Yusuf b. Musa nâm kimesneler li ecli’ş-şehâde meclis-i şer‘-i şerîfe hâzırân olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki fi’l-hakīka müdde‘î-i mesfûr Mehmed meblağ-ı mersûm dört bin akçeyi vasiyy-i merkūmdan da‘vâ ettikde Mezid b. Said ve Musa b. Yusuf nâm kimesneler meblağ-ı mezkûr dört bin akçenin aslına şehâdet-i şer‘iyye ettiklerinden sonra hüccet-i mesfûre müşârün-ileyh Muharrem Efendi zamânında vasiyy-i mezbûr muvâcehesinde ketb olunmuştur deyû edâ-i şehâdet-i şer‘iyye eylediklerinde şâhidân-ı mezbûrânın şehâdetleri ba‘de’t-ta‘dîl ve’t-tezkiyye hayyiz-i kabûlde vâkı‘a olup meblağ-ı merkūm dört bin akçeyi merhûm-ı mezbûrun muhallefâtından hükm olunup mâ vaka‘a alâ vukū‘ihî ketb olundu. Tahrîren fî gurreti şehri Ramazâni’l-mübârek sene sitte ve elf. Şuhûd: Mehmed Bey b. Abdullah, Mahmud Halîfe b. Muharrem el-İmâm, Yusuf b. Abdullah, el-Hâc Ahmed b. Mustafa, Said b. Cemal, Hüseyin b. Hasan, Hüsrev b. Abdullah el-Muhzır, Mehmed b. Yusuf el-Muhzır
|