.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 278
Hüküm no: 349
Orijinal metin no: [51a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hümâ bt. Abdullah adlı câriyenin Sâkine Hatun’a ait olduğu

Mahmiye-i Galata hâricinde vâki‘ Mustafa Ağa mahallesi sâkinlerinden olup bundan akdem vefât eden merhûm Ahmed Reis b. Abdullah nâm müteveffânın sagīrleri Mustafa ve Rahime’ye kıbel-i şer‘den vasî nasb olunan Mahmud Reis b. Muharrem nâm kimesne mahfil-i kazâda işbu sâhibetü’l-kitâb müteveffâ-yı mezbûr Ahmed Reis’in zevcesi olup vefât eden merhûme Sâkine Hâtun bt. Pîrî nâm müteveffâtın câriyesi olan Hümâ bt. Abdullah nâm kimesne muvâcehesinde takrîr-i da‘vâ edip câriye-i merkūme Ahmed Reis’in mülkü olup hâlen vasîsi olduğum sagīrân-ı mezbûrân Mustafa ve Rahime için zabt etmede inâd ve muhâlefet üzre olup zabtıma mâni‘ olur vesâyetim hasebiyle suâl olunup mûcibin taleb ederin dedikde gıbbe’s-suâl câriye-i mersûme cevâb verip merhûm Ahmed Reis beni Azak nâm beldeden zevcesi merhûme Sâkine Hâtun için iki bin altı yüz akçeye iştirâ edip merhûme Sâkine Hâtun’a getirmişdir. Hâlen mezbûre Sâkine Hâtun’un mülk-i müşterâsıyım dedikde câriye-i merkūmeden kavlini musaddık beyyine taleb olunup udûl-i müslimînden Hasan b. Mehmed ve Yunus Bey b. Abdullah ve Asil Bey b. İsmail nâm kimesneler meclis-i şer‘a hâzırûn olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki merhûme Sâkine Hâtun zevci müteveffâ-yı mezbûr Ahmed Reis’e Azak nâm beldeye gider oldukda bir beyaz zenne kemha kaftan ve bir sarı zenne kemha ve bir beyaz kuşak verip esbâb-ı mezbûru mezkûr Ahmed Reis belde-i mesfûrede iki bin altı yüz akçeye bey‘ edip meblağ-ı merkūm iki bin altı yüz akçeye mezbûre Hümâ’yı zevcesi mesfûre Sâkine için iştirâ etmişdir hâlen mezkûre Hümâ merhûme Sâkine Hâtun’un mülk-i müşterâsıdır husûs-ı mezbûreye şâhidiz ve şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra câriye-i mezbûre Hümâ mezbûre Sâkine Hâtun’un mülkiyetine hükm olunup mâ vaka‘a kayd olundu. Tahrîren fî evâsıtı şehri Ramazâni’l-mübârek sene sitte ve elf. Şuhûd: Hasan b. Abdullah, Mustafa Çavuş b. Mehmed, Hüsrev b. Abdullah el-Muhzır, Mustafa b. Ramazan, Mehmed b. Yusuf, Ali b. Abdullah er-Râcil