|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 281 Hüküm no: 355 Orijinal metin no: [51b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Huri bt. Abdullah’ın evinin borcundan dolayı satıldığı
Mahmiye-i Kostantıniyye mahallâtından Seydi Halîfe mahallesinde bundan akdem fevt olan merhûme Hûri bt. Abdullah’ın zevci ve vârisi olan Osman b. ( ) nâm kimesne meclis-i şer‘-i şerîfe hâzır olup, mahalle-i mezbûrede kâin, tahtânî iki beyti, iki selâmlığı, kileri, helâyı, eşcâr-ı müsmire ve gayr-ı müsmiresi hâvî bahçeyi müştemil, bir tarafdan İbrahim b. Yusuf mülkü, diğer tarafdan Mülâyim bt. Abdullah mülkü, öteki tarafdan Mehmed b. Hürrem mülkü ve vakıf ile ve diğer tarafdan da tarîk-i âm ile mahdûd bulunan cemî‘ menzili cümle tevâbi‘ ve levâhıkı ile râyicü’l-vakt yirmi iki bin akçe semen-i mu‘ayyen-i makbûzla merhûme-i mezbûrenin karındaşının oğlu hâmil-i hâze’l-kitâb Mehmed b. Ali’ye îcâb ve kabûlü hâvî bey‘-i sahîh ile bey‘ ettiğini ikrâr ve i‘tirâf eyledi. Mezbûr Mehmed de müteveffât-ı mezkûrenin muhallefâtından olan menzil-i mesfûru ondan iştirâ etti. Vâki‘ ikrâr, müşterî-i mezbûr tarafından vicâhen ve şifâhen tasdîk edildi. İşbu mübâya‘a, müteveffât-ı merkūmenin borçlu olarak öldüğünün ve akār-ı mezbûrdan başka terekesinde malı olmadığının hükkâm-ı kirâm indinde sâbit olmasından ve menzil-i mezkûrun mecâlis-i tâlibîn ve mehâfil-i râgıbîne iki ay müddetle arz olunup semen-i mezkûrla müşterî-i mezkûr üzerinde karâr kılmasından sonra vâki‘ oldu. Cerâ zâlike ve hurrire fî evâsıtı şehri Recebi’l-mürecceb sene sitte ve elf. Şuhûd: Es-Sâbikūn
|