|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 286 Hüküm no: 365 Orijinal metin no: [52b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hasan Reis’in kölesini sözleşmeli olarak azat ettiği
Mahmiye-i Galata dâhilinde Yolcuoğlu mahallesi sâkinlerinden el-Hâc Hasan Reis b. Ali nâm kimesne meclis-i şer‘-i şerîfe işbu bâ‘isü’l-kitâb uzun boylu sarışın açık kaşlı koyun elâ gözlü başının sol cânibinde eser-i cerâhati olan Ferhad b. Abdullah nâm abd-i memlûkünü ihzâr ve mahzarında takrîr-i kelâm ve ta‘bîr ani’l-merâm edip mevsûf-ı mezkûr abd-i memlûkünü târih-i kitâbdan on iki bin akçe kitâbete kesip meblağ-ı merkūm on iki bin akçeyi edâ eyledikde sâir ahrâr-ı asliyyîn gibi hür olsun dedikde abd-i mezkûr dahi kitâbet-i merkūmeyi kabûl ve mûcebine kıyâmı mültezim oldukda mâ hüve’l-vâki‘ alâ vukū‘ihî ketb ve imlâ olunup yed-i tâlibe vaz‘ olundu ki vakt-i hâcetde müzekkir-i mâ cerâ ola. Tahrîren fî evâili şehri Şevvâli’l-mükerrem sene sitte ve elf. Şuhûd: Memi b. Abdürrahim el-İmâm, Mustafa b. Abdullah el-Müezzin, Hüsrev b. Abdullah, Mehmed Bey es-Solak, Mehmed Reis b. Ali, Mehmed b. Yusuf ve gayruhüm
|