.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 287
Hüküm no: 366
Orijinal metin no: [52b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen kimsenin terekesindeki beytülmâl payının alındığı

Mahmiye-i Galata müzâfâtından kasaba-i İstinye mahallâtından Kürkçübaşı mahallesi sâkinlerinden bundan akdem vefât eden merhûme Meryem Hâtun bt. Yahya nâm müteveffâtın vâris-i ma‘rûfundan zevci olup hâlen Dergâh-ı âlî solakları kethüdâsı olan fahrü’l-emâsil ve’l-akrân Mahmud Kethüdâ b. Abdülmennân nâm kimesneden gayrı vârisi olmayıp müteveffât-ı mezbûrenin bi hasebi’ş-şer‘-i eş-şerîf muhallefâtının nısfı zevci olan müşârün-ileyh Mahmud Kethüdâ’ya ve nısf-ı âharı cânib-i mîrîye âid ve râci‘ olmağın hâlen mahmiye-i Galata ve Havâss-ı Kostantıniyye’de beytülmâl-i hâssa emîni olup müteveffât-ı mezkûrenin muhallefâtına vâzı‘ü’l-yed olan fahrü’l-ümenâ Mehmed Çavuş b. Abdullah meclis-i şer‘-i şerîf-i lâzımü’t-tevkīrde hâmil-i hâze’l-kitâb merhûme-i merkūmenin zevci olan mûmâ-ileyh Mahmud Kethüdâ muvâcehesinde takrîr-i kelâm ve ta‘bîr ani’l-merâm edip mahalle-i mezbûre ahâlisinden Mehmed Ağa b. Mehmed ve Ahmed Bey b. Abdullah el-Cündî ve Mahmud Beşe b. Abdullah er-Râcil ve Murad b. Abdullah nâm kimesneler ve ahâlî-i mahalleden cemm-i gafîr ve cem‘-i kesîr tahmîni ile müteveffât-ı merkūmenin cümle muhallefâtından mahalle-i merkūmede vâki‘ bir tarafı Hasan Beşe b. Abdullah er-Râcil mülküne ve etrâf-ı selâsesi tarîk-i âm ile mahdûd olup bir beyt-i ulvî ve iki beyt-i süflî ve ahırı ve pınarı ve fırını ve kenîfi ve hadîka-i zât-ı eşcâr-ı müsmire ve gayr-ı müsmireyi müştemil olan menzili mîrî cânibine bahâya tutulmak evlâ ve ahrâ olmağın on sekiz bin akçe bahâya tutulup ve müteveffât-ı mesfûrenin kasaba-i merkūme sınırı dâhilinde vâki‘ Kozpınarı demekle ma‘rûf olan mevzi‘de inde’l-ahâlî ve’l-cîrân ma‘lûmetü’l-hudûd olup eşcâr-ı müsmire ve gayr-ı müsmiresi ile on dönüm mikdârı bağı dahi beş bin akçe bahâya tutulup ve merhûme-i mesfûrenin hâne esbâbı dahi dört bin akçe bahâya tutulup ve mehr-i müecceli dahi bin akçe olup cem‘an otuz bir bin akçe olur meblağ-ı merkūm otuz bir bin akçenin üç bin akçesi müteveffât-ı mesfûrenin techîz ve tekfînine sarf olunup bâkī yirmi sekiz bin kalıp meblağ-ı mersûm yirmi sekiz bin akçesinin nısfı on dört bin akçe eder cânib-i mîrîye âid ve râci‘ olmağın emânetim hasebiyle meblağ-ı merkūm on dört bin akçeyi mûmâ-ileyh kethüdâ yedinden bi’t-tamâm ve’l-kemâl alıp kabz eyledim ba‘de’l-yevm merhûme-i mezkûrenin muhallefâtı husûsuna müte‘allik müşârün-ileyh kethüdâ ile vechen mine’l-vücûh ve sebeben mine’l-esbâb da‘vâ ve nizâ‘ım kalmayıp zimmetini ibrâ ve iskāt eyledim dedikde mukırr-ı mezbûrun vech-i meşrûh üzre olan kelâmını mukarrun lehü’l-mesfûr vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde müzekkir-i mâ cerâ ola. Tahrîren fî evâhiri şehri Ramazâni’l-mübârek sene sitte ve elf. Şuhûd: İbrahim Bey b. Abdullah es-Solak, Şaban Bey b. Kasım es-Solak, el-Hâc Rıdvan b. Abdullah el-Cündî, Mustafa Bey b. Abdullah el-Cündî, Eynehan Bey b. Abdullah es-Solak, Derviş Bey b. Abdullah es-Solak