.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 289
Hüküm no: 369
Orijinal metin no: [53a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Trablus beylerbeyi Mehmed Paşa’nın kölesini azat ettiği

Hâlen Trablus beylerbeyisi olan emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm Mehmed Paşa b. Abdulallâm hazretleri tarafından husûs-ı âti’z-zikri ikrâr ve i‘tâka Receb Bey b. Abdullah ve Hüseyin Bey b. Abdullah nâm kimesneler şehâdetleri ile şer‘an vekâlet-i sâbite olan Rıdvan Bey b. Abdullah nâm kimesne meclis-i şer‘-i şerîf-i lâzımü’t-tevkīrde işbu sâhibü’l-kitâb orta boylu açık kaşlı kara yağız başında yarası olan Korsiyyü’l-asl Bastiyan v. Cevanpero nâm zimmî muvâcehesinde takrîr-i kelâm ve ta‘bîr ani’l-merâm edip müvekkilim müşârün-ileyh paşa hazretleri mevsûf-ı mezkûr abd-i memlûkünü hasbeten lillâhi’l-aliyyi’l-azîm ve taleben li merzâti rabbihi’l-kerîm malından âzâd eyledi ba‘de’l-yevm gulâm-ı mezbûr uhdesinde utekā üzerinde mevâlî için olan hakk-ı velâdan gayrı hakkım kalmayıp sâir ahrâr-ı asliyyîn gibi hür olsun dedi deyû bi’l-vekâle ikrâr ve i‘tirâf eylediğinde mukarrun lehü’l-mezkûr vekîl-i mersûmun ikrâr-ı meşrûhunu vicâhen tasdîk ve şifâhen tahkīk ettikden sonra ıtkına hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Şevvâli’l-mükerrem sene sitte ve elf. Şuhûd: Murad Bey b. Abdullah, Mehmed b. Abdullah, Süleyman b. Abdullah, Şaban Reis b. Abdullah er-Reisü’s-sultânî, Hasan b. Abdullah, Hüsrev b. Abdullah, Hüseyin b. Abdullah