.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 288
Hüküm no: 368
Orijinal metin no: [53a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Miras taksîminde sulh olunduğu

Mahmiye-i Galata müzâfâtından kasaba-i Kasımpaşa mahallâtından el-Hâc Hasan mahallesi sâkinelerinden Râbia Hâtun bt. Sefer nâm müteveffâtın verâseti sulbî oğlu Mustafa b. Ahmed ve zevci olan Mehmed b. Ali nâm kimesnelere münhasıra olup lâkin oğlu mezkûr Mustafa Mısr-ı Kahire’de olmağın hâlen mahmiye-i Galata ve Havâss-ı Kostantıniyye’de vâki‘ beytülmâl-i hâssa ve mâl-ı gāib emîni olan fahrü’l-ümenâ Mehmed Çavuş b. Abdullah meclis-i şer‘-i şerîfde işbu sâhibü’l-kitâb müteveffât-ı mezkûrenin zevc-i mezkûru olan mersûm Mehmed muvâcehesinde takrîr-i da‘vâ edip müteveffât-ı mesfûrenin oğlu Mısr-ı Kahire’de olmağla vâlidesinden irs-i şer‘le intikāl eden hisse-i şâyi‘asını emânetim hasebiyle taleb ve zabt etmek istediğimde merkūm Mehmed zabtıma mâni‘ olur suâl olunup mûcebin taleb ederin dedikde gıbbe’s-suâl mersûm Mehmed cevâb verip merhûme-i mezkûre vefât etmezden üç ay mukaddem ki sene sitte ve elfde vâki‘ mâh-ı Receb evâilinde ilm-i şer‘le beynimizde ma‘lûm olup yedinde olan kalîl ve kesîr cümle muhallefâtını bana üç bin akçeye bey‘-i sahîh ile bey‘ edip kabz-ı semen ve teslîm-i müsemmen etmişdir ve merhûme-i mezbûrenin mehr-i müecceli dahi bin akçe olup meblağ-ı merkūm bin akçeyi dahi târih-i mezbûrede hibe edip mukābele-i hibede bir firesküri alaca ivâz vermişimdir hâlen kaziyye minvâl-i meşrûh üzre olduğuna beyyinem dahi vardır dedikde fi’l-vâki‘ mastûr Mahmud’dan da‘vâsına mutâbık ve makāline muvâfık beyyine taleb olundukda udûl-i müslimînden Mehmed Efendi b. Nurullah ve İsa b. Mustafa el-İmâm ve Mustafa b. Abdullah er-Râcil ve Hasan Reis b. Abdullah nâm kimesneler meclis-i şer‘-i şerîfe li ecli’ş-şehâde hâzırûn olup gıbbe’l-istişhâdi’ş-şer‘î şöyle edâ-i şehâdet-i şer‘iyye eylediler ki fi’l-hakīka merhûme-i mezbûre Râbia Hâtun vefâtından üç ay mukaddem yedinde olan kalîl ve kesîr cümle muhallefâtını bizim huzûrumuzda zevc-i mesfûr Mehmed’e bey‘-i sahîh ile bey‘ edip kabz-ı semen ve teslîm-i müsemmen etmişdir ve bin akçe mehr-i müecceli dahi merkūm Mehmed’e hibe edip mukābele-i hibede zevci bir firesküri alaca ivâz verip merhûme dahi mukābele-i hibede olan ivâzı kabûl edip kaziyye minvâli meşrûh üzre olduğuna şâhidiz ve şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra sıhhat-i bey‘a ve hibeye hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şevvâli’l-mükerrem min şühûri sene sitte ve elf. Şuhûd: Mehmed Çelebi b. Yusuf, Hamza b. Rıdvan, el-Hâc Süleyman b. Abdullah, Hasan b. Abdullah, Ramazan b. ( ), Hasan b. Ramazan el-Müezzin, Hüsrev b. Abdullah el-Muhzır, Mehmed b. İsa el-Muhzır