Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 292 Hüküm no: 373 Orijinal metin no: [53b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad b. Abdullah’ın ortaklıktan dolayı Ali b. Abdullah’ta alacağı olduğu Udûlden Mustafa b. Hüseyin Bey ve İbrahim b. Ahmed ve Memi Reis b. Abdullah nâm kimesneler meclis-i şer‘-i şerîfe hâzırûn olup, Beşiktaş kasabası mahallâtından Sinan Paşa mahallesinde sâkin iken bundan akdem vilâyet-i Rumeli’nde vâki‘ Pravişte kazâsı tevâbi‘inden Mostinye karyesinde vefât eden Ali b. Abdullah nâm âzâdlı kölenin efendisi ve müteveffâ-yı mesfûrun Ümmühâni bt. Ali nâm sagīre kızının kıbel-i şer‘den mansûb vasîsi olan Hüseyin Bey b. Abdülmennân mahzarında, hâmil-i hâze’l-kitâb Murad b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i mezbûrun, müteveffâ-yı mezkûrun zimmetinde beynlerinde ma‘lûm olan şirket cihetinden lâzımü’l-edâ ve vâcibü’l-kazâ râyicü’l-vakt on iki bin akçe hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince meblağ-ı merkūmun müteveffâ-yı merhûmun terekesinden müdde‘î-i mersûma ödenmesine hükm etti. Cerâ zâlike ve hurrire fi’t-târihi’l-mezbûr. Şuhûd: Es-Sâbikūn