Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 293 Hüküm no: 374 Orijinal metin no: [54a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun’un Ali b. Abdullah’ta mehir alacağı olduğu Hasan Halîfe b. Abdullah el-Müezzin ve Piyâle Ağa b. Abdullah nâm kimesneler meclis-i şer‘-i şerîfe hâzırân olup Beşiktaş kasabası mahallâtından Sinan Paşa mahallesinde sâkin iken bundan akdem vilâyet-i Rumeli’nde vâki‘ Pravişte kazâsı tevâbi‘inden Mostinye karyesinde vefât eden Ali b. Abdullah nâm âzâdlı kölenin efendisi ve müteveffâ-yı mesfûrun Ümmühâni bt. Ali nâm sagīre kızının kıbel-i şer‘den mansûb vasîsi olan Hüseyin Bey b. Abdülmennân mahzarında, merhûm-ı mezbûrun zevcesi Sâliha Hâtun bt. Abdullah kıbelinden husûs-ı âti’z-zikre vekâleti şâhideyn-i mezkûreynin şehâdetleri ile sâbit olan hâmil-i hâze’l-kitâb İsmail Bey b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûrenin, müteveffâ-yı mezbûrun zimmetinde nikâhında ma‘kūdun-aleyh olan mehri cihetinden lâzımü’l-edâ ve vâcibü’l-kazâ râyicü’l-vakt beş bin akçe hakkı vardır. Müdde‘iye-i mersûme, meblağ-ı mezkûru almadığına, hibe etmediğine, bi vechin mine’l-vücûh ve sebebin mine’l-esbâb zimmetini ibrâ etmediğine dâir yemîn billâhi te‘âlâ ettikden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra hâkim-i askerî, şehâdetleri mûcebince meblağ-ı merkūmun müteveffâ-yı merhûmun muhallefâtından müdde‘iye-i mersûmeye ödenmesine hükm etti. Cerâ zâlike ve hurrire fi’t-târihi’l-mezbûr. Şuhûd: Es-Sâbikūn fi’l-varaki’s-sâbık