Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 297 Hüküm no: 380 Orijinal metin no: [54b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gemi satışı Mahmiye-i Galata hâricinde vâki‘ Cihangir mahallesi sâkinlerinden olup bundan akdem vefât eden merhûm Rıdvan Çavuş b. Abdullah nâm müteveffânın sulbiye kızı olan ( ) bt. Rıdvan Çavuş ve zevce-i metrûkesi olan ( ) nâm hâtunlar tarafından husûs-ı âti’z-zikri da‘vâya ve bey‘a ve semenini kabz ve îsâle Süleyman b. Abdullah ve Ali Bey b. Abdullah nâm kimesneler şehâdetleri ile şer‘an vekâleti sâbite olan Ferruh b. Abdullah nâm kimesne mahfil-i kazâda işbu sâhibü’l-kitâb Muharrem Reis b. Hüseyin nâm kimesne muvâcehesinde takrîr-i kelâm ve ta‘bîr ani’l-merâm edip müteveffâ-yı mezkûrun cümle muhallefâtından ığrıb gemisi demekle ma‘rûf olan gemisinin nısfı cümle âlât ve esbâbiyle bey‘ men yezîd tarîki ile eyyâm-ı müte‘addidede mezâd olunup rağabât-ı nâs bi’l-külliyye münkatı‘a oldukdan sonra merkūm Muharrem Reis üzerinde yirmi altı bin akçede karâr etmeğin sefîne-i mezbûrenin nısfını vekâletim hasebiyle meblağ-ı mersûm yirmi altı bin akçeye mesfûr Muharrem Reis’e bey‘-i sahîh ile bey‘ edip kabz-ı semen ve teslîm-i mebî‘ eyledim ba‘de’l-yevm sefîne-i mezkûrenin nısfı mezbûr Muharrem Reis’in mülk-i müşterâsı[dır] keyfe mâ yeşâ’ mutasarrıf ola dedikde mukırr-ı merkūmun vech-i meşrûh üzre kelimâtını mukarrun lehü’l-mastûr vicâhen tasdîk ve şifâhen tahkīk ettikden sonra sıhhat-i bey‘a ve cevâz-ı şirâya hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâhiri şehri Şevvâli’l-mükerrem sene sitte ve elf. Şuhûdü’l-hâl: Şaban Reis b. Sun‘ullah, Mustafa Reis b. Ahmed, Mehmed b. Abdullah, Ahmed b. Halil, İdris b. Ali, Mustafa Çelebi b. Murad, Hüsrev b. Abdullah, Bekir b. Mehmed ve gayruhüm