Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 302 Hüküm no: 388 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı Hızır’ın Ali Bey’e olan borcunu ödediği Mahmiye-i Kostantıniyye mahallâtından Keklikçi mahallesi sükkânından olup bundan akdem Bursa’ya gider iken gark olan Ali Bey b. Bahşi nâm bevvâb-ı sultânînin li eb ve üm karındaşı olan Mehmed Bey b. Bahşi nâm bevvâb-ı sultânî asâleten ve merhûm-ı mezbûrun sagīreleri Emine ve Hatice’ye kıbel-i şer‘den vasî nasb olan umdetü’l-havâs ve’l-mukarrebîn Dârü’ş-şifâ ağası olan Hasan Ağa b. Abdullah tarafından husûs-ı âti’z-zikre vekîl olup Mustafa b. Abdullah ve Pîr Mehmed b. Mehmed nâm kimesneler şehâdetleri ile şer‘an vekâleti sâbite olan fahrü’l-akrân Kurd Çavuş b. Receb vekâleten meclis-i şer‘-i şerîf-i lâzımü’t-tevkīrde işbu sâhibü’l-kitâb mahmiye-i Galata’da subaşı olan Hızır b. Abdullah muvâcehesinde takrîr-i kelâm ve ta‘bîr ani’l-merâm edip merhûm-ı mezbûr Ali Bey’in mersûm Cafer Subaşı zimmetinde olan dört bin akçeyi bi’t-tamâm ve’l-kemâl alıp kabz eyleyip mezkûr Cafer Subaşı zimmetinde merhûm-ı mersûm Ali Bey’in vechen mine’l-vücûh ve sebeben mine’l-esbâb bir akçe ve bir habbe hakkı kalmayıp zimmetini bi’l-asâle ve bi’l-vekâle ibrâ ve iskāt eyledik ba‘de’l-yevm merhûm-ı mezkûra veyâhud zikr olunan meblağa mute‘allik da‘vâ ve nizâ‘ bi’z-zât veya bi’l-vâsıta zuhûr eder ise lede’l-hükkâmi’l-kirâm mesmû‘a ve makbûle olmaya dediklerinde mukırrân-ı merkūmânın vech-i meşrûh üzre olan kelimâtını mezbûr Cafer Subaşı vicâhen tasdîk ve şifâhen tahkīk eyledikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâhiri şehri Şevvâli’l-mükerrem sene sitte ve elf. Şuhûd: Hasan Halîfe b. Ahmed, Derviş Halîfe b. Mehmed el-İmâm, Ali Bey b. Sefer, Mehmed Ali, Ali b. Bekir, diğer Ali b. Hüseyin, Davud Halîfe b. Mehmed ve gayruhüm