Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 314 Hüküm no: 409 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canfeda Hatun’un terekeden mal saklamadığına dair yemin ettiği Mahmiye-i Galata tevâbi‘inden Beşiktaş’da vâki‘ Sinan Paşa mahallesinde sâkin olup bundan akdem kendi sefînesinde katl olunan Hasan Reis b. Abdullah nâm müteveffânın sagīre kızı Fâtıma’ya kıbel-i şer‘den vasî nasb olunan Bâli Çavuş b. Hüseyin müteveffâ-yı mezbûrun zevce-i metrûkesi olup muhallefâtına vâzı‘ü’l-yed olan Canfeda bt. Abdullah nâm hâtunu meclis-i şer‘-i şerîfe ihzâr ve muvâcehesinde takrîr-i kelâm ve ta‘bîr ani’l-merâm edip müteveffâ-yı merkūm Hasan Reis’in tahrîr olunandan mâ‘adâ ba‘zı esbâb ve nakid akçesin ahz ve ketm eylemekle yetîme-i mezbûreye küllîce gadr olmuşdur cânib-i şer‘den suâl olunup alıvermesin taleb ederim dedikde gıbbe’s-suâl ve’l-inkâr müdde‘î-i mezbûrdan kelâmına muvâfık beyyine taleb olundukda beyyineden âcizim tahlîf olunmasını taleb ederim deyicek mezbûre Canfeda Hâtun’a yemîn teklîf olundukda müteveffâ-yı mezbûr Hasan Reis’in hîn-i kısmetinde tahrîr olunandan eğer esâs-ı beytdir ve sâir esbâbdır ve eğer nakiddir bir nesne ahz ve ketm etmedim deyû yemîn billâhi te‘âlâ eyledikde mâ vaka‘a bi’t-taleb ketb olunup yed-i tâlibe vaz‘ olundu. Tahrîren fî evâili şehri Zilka‘deti’ş-şerîfe sene sitte ve elf. Şuhûd: Es-Sâbikūn