Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 317 Hüküm no: 412 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey’in peynir satın almak için Perviz Bey’e yetmiş bin akçe verdiği Mahmiye-i Galata dâhilinde vâki‘ Bereketzâde mahallesi sâkinlerinden olup bundan akdem vefât eden merhûm Hüseyin Bey b. Abdullah nâm müteveffânın muhallefâtına vâzı‘ü’l-yed olan mahmiye-i mezbûre ve Havâss-ı Kostantıniyye beytülmâl-i hâs emîni olan Mehmed Çavuş b. Abdullah ve Davud Çavuş b. Abdullah nâm kimesneler meclis-i şer‘-i şerîf-i lâzımü’t-tevkīrde işbu hâmil-i hâze’l-kitâb Hâslar kazâsına tâbi‘ Bosna Filibozu demekle ma‘rûf yaylakda vâki‘ mandıraları mutasarrıf olan Perviz Bey b. Abdullah nâm cündînin husûs-ı âti’z-zikre vekîl-i şer‘îsi olan Sefer Bey b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edip mezbûr Hüseyin Bey hâl-i hayâtında ve kemâl-i sıhhatinde mezkûr Perviz Bey’e peynir için yetmiş bin nakd-i râyic fi’l-vakt akçe vermişdir hâlen zimmetinde olup emânetimiz hasebiyle meblağ-ı merkūmu suâl ve mûcebin taleb ederiz dediklerinde gıbbe’s-suâl vekîl-i mezbûr cevâb verip meblağ-ı mezbûrun yetmiş bin akçeden otuz dört bin iki yüz otuz iki akçelik peynir verilip bâkī otuz beş bin yedi yüz altmış sekiz akçe kalmışdır dedikde meblağ-ı merkūm otuz beş bin yedi yüz altmış sekiz akçeyi vekîl-i mezbûr yedinden emânetim hasebiyle mîrî için bi’t-tamâm ve’l-kemâl alıp kabz eyledik dediklerinde mukırrân-ı mezkûrânın vech-i meşrûh üzre olan kelimâtını vekîl-i merkūm bi’l-muvâcehe tasdîk ve bi’l-müşâfehe tahkīk ettikden sonra mâ vaka‘a bi’t-taleb ketb olunup yed-i tâlibe vaz‘ olundu. Tahrîren fî evâili şehri Zilka‘de sene sitte ve elf. Şuhûd: Abdülkādir Halîfe b. Hacı, Ahmed Reis b. Ali el-Müezzin, Mustafa Çelebi b. Ahmed, Rıdvan Bey b. Abdullah el-Cündî, Mustafa b. Abdullah el-Cündî ve gayruhüm