Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 317 Hüküm no: 413 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canfeda Hatun’un terekeden mal saklamadığına yemin ettiği Mahmiye-i Galata tevâbi‘inden Beşiktaş’da vâki‘ Sinan Paşa mahallesi sâkin[lerinden olu]p bundan akdem vefât eden Yasemin bt. Abdullah nâm hâtunun sagīre kızı Fâtıma’ya kıbel-i şer‘den vasî nasb olunan Bâli Çavuş b. Hüseyin müteveffât-ı mezbûrenin muhallefâtına vâzı‘ü’l-yed olan Canfeda bt. Abdullah’ı meclis-i şer‘-i şerîfe ihzâr ve muvâcehesinde takrîr-i kelâm ve ta‘bîr ani’l-merâm edip mezbûre Yasemin’in hîn-i kısmetde tahrîr olunandan mâ‘adâ ba‘zı esbâb ve nakid akçesini ahz ve ketm etmekle sagīre-i mezbûreye küllî gadr olmuşdur cânib-i şer‘den suâl olunmasını taleb ederim dedikde gıbbe’s-suâl ve’l-inkâr müdde‘î-i mezbûrdan beyyine taleb olundukda beyyineden âcizim tahlîf olunsun demeğin mezbûre Canfeda Hâtun’a yemîn teklîf olundukda müteveffât-ı mezbûre Yasemin’in hîn-i kısmetde tahrîr olunan[dan] mâ‘adâ eğer esâs-ı beytdir ve eğer nakid akçedir bir nesnesini ahz ve ketm edip hile ve hıyânet ve serika ve sakāmet etmedim deyû yemîn billâhi te‘âlâ eyledikde vâki‘ hâl bi’t-taleb ketb olunup yed-i tâlibe vaz‘ olundu. Tahrîren fî evâili şehri Zilka‘deti’ş-şerîfe sene sitte ve elf. Şuhûd: El-Hâc Memi b. Abdullah, el-Hâc Rıdvan b. Abdullah, Ali b. Abdullah, Şaban b. Abdullah, Mustafa b. Ali, Hüsrev b. Ali, Mehmed b. Yusuf