Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 322 Hüküm no: 419 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üç esirin Hasan Paşa’dan satın alındığı Mahmiye-i Galata müzâfâtından Beşiktaş’da Yahya Efendi mahallesi sâkinlerinden olup bundan akdem vefât [eden] Osman Çelebi b. Durmuş nâm müteveffânın sulbî oğlu Durmuş nâm sagīrin kıbel-i şer‘den hasbî nâzırı olan Haydar Bey b. Abdullah nâm kimesne meclis-i şer‘-i şerîf-i lâzımü’t-tevkīrde sagīr-i mezkûr Durmuş vasiyy-i muhtârı olan Hüseyin Bey b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edip merhûm-ı mezkûrdan bi hasebi’ş-şer‘i’ş-şerîf oğlu merkūm Durmuş’a nezâretim hasebiyle ber mûceb-i defter intikāl eden hisse-i şer‘iyyesinin muhâsebesini görmek taleb eylediğimde merhûm-ı mezbûrun esîrlerinden üç aded esîr hâlen mezkûr vasiyy-i muhtârın taht-ı tasarrufunda olup ne vechile tasarruf eder suâl olunup mûcibini taleb ederim dedikde gıbbe’s-suâl merkūm vasiyy-i muhtâr merhûm-ı mesfûrun esîrlerini bundan akdem vefât eden merhûm Kapudân Hasan Paşa hazretlerine vesâyetim hasebiyle bey‘ ettiğimden sonra müşârün-ileyh Hasan Paşa’dan üç aded esîri kendi malımla iştirâ eyledim deyû cevâb verdikden sonra yine meclis-i vâhidde mersûm vasiyy-i muhtâr zikr olunan esîrleri sûk-ı sultânîde bey‘ men yezîd tarîkiyle mezâd olunup rağabât-ı nâs külliyyen münkatı‘a oldukdan sonra üç aded esîri kendi malımla iştirâ eyledim ve takrîr-i mezbûrdan murâdım üç aded esîri müşârün-ileyh Hasan Paşa’dan aldığımı beyândır dedikde mâ hüve’l-vâki‘ nâzır-ı mezbûr Haydar Bey talebiyle ketb olunup tahrîr olundu. Tahrîren fî evâsıtı şehri Zilka‘de sene sitte ve elf. Şuhûd: İbrahim Efendi b. Mehmed, Kadri Halîfe b. Nebi, Hüseyin Çavuş b. Hasan, Davud Ağa b. Abdullah, Hacı Habaş?, Receb b. Ali, Mustafa b. Abdullah