Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 323 Hüküm no: 420 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ahmed’in Hüseyin Bey’de ödünçten alacağı olduğu Mahmiye-i Galata dâhilinde vâki‘ Bereketzâde mahallesi sâkinlerinden olup bundan akdem vefât eden merhûm Hüseyin Bey b. Abdullah nâm müteveffânın muhallefâtına vâzı‘ü’l-yed olup mahmiye-i mezbûre ve Havâss-ı Kostantıniyye’de beytülmâl-i hâs emîni olan Mehmed Çavuş b. Abdullah ve Davud Çavuş b. Abdullah ve beytülmâl-i mesfûrun nâzırı olan Mustafa Bey b. Abdullah nâm kimesneler meclis-i şer‘-i şerîf-i lâzımü’t-tevkīrde işbu sâhibü’l-kitâb Mustafa b. Ahmed nâm kimesne muvâcehesinde takrîr-i kelâm ve ta‘bîr ani’l-merâm edip mezkûr Mustafa merhûm-ı mezbûrun zimmetinde bi hasebi’ş-şer‘î’ş-şerîf el-Hâc Piyâle b. Abdullah ve Mehmed b. Osman nâm kimesneler şehâdetleri ile alâ tarîki’l-karz altı bin akçe isbât eylediği hakkı mukābelesinde dört bin beş yüz akçeye zimmetini ibrâ ve iskāt edip meblağ-ı merkūm dört bin beş yüz akçeyi mersûm Mustafa’ya teslîm eyledik ol dahi alıp kabûl ve kabz edip zimmetimizi ibrâ-i âm ile ibrâ ve iskāt-ı tâm ile iskāt eyleyip ba‘de’l-yevm husûs-ı mezbûra müte‘allik da‘vâ ve nizâ‘ı kalmadı dediklerinde merkūmûn-ı mersûmunun vech-i meşrûh üzre olan kelimâtını mastûr Mustafa vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî gıbbe’t-taleb terkīm olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Zilka‘de sene sitte ve elf. Şuhûd: Ahmed Çelebi b. Mehmed, Mehmed Reis b. Ahmed, Mahmud b. İslâm, Mahmud b. Ahmed, Süleyman b. Abdullah, Abdülkādir Halîfe b. Hacı, Hüsrev b. Ali, Mehmed b. Ali