Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 325 Hüküm no: 423 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ahmed’in ödünç verdiği miktarı aldığı Mahmiye-i Galata dâhilinde vâki‘ Bereketzâde mahallesi sâkinlerinden Mustafa b. Ahmed nâm kimesne meclis-i şer‘-i şerîf-i lâzımü’t-tevkīrde işbu sâhibü’l-kitâb mahmiye-i mezbûre ve Havâss-ı Kostantıniyye’de beytülmâl-i hâs emîni olup yine mahmiye-i mezkûre dâhilinde vâki‘ Bereketoğlu mahallesi sâkinlerinden olup bundan akdem vefât eden merhûm Hüseyin Bey b. Abdullah nâm müteveffânın muhallefâtına vâzı‘ü’l-yed olan Mehmed Çavuş b. Abdullah ve Davud Çavuş b. Abdullah ve beytülmâl-i mastûrun nâzırı olan Mustafa Bey b. Abdullah nâm kimesneler muvâcehesinde bi’t-tav‘ ve’r-rızâ ikrâr ve i‘tirâf edip merhûm-ı mezbûr Hüseyin Bey zimmetine bi hasebi’ş-şer‘î eş-şerîf el-Hâc Piyâle b. Abdullah ve Mehmed b. Osman nâm kimesneler şehâdetleri ile alâ tarîki’l-karz altı bin akçe isbât eylediğim hakkım mukābelesinde dört bin beş yüz akçeye ibrâ-i âm ile ibrâ ve iskāt-ı tâm ile iskāt eyleyip meblağ-ı merkūm dört bin beş yüz akçeyi mezkûrûn Mehmed Çavuş ve Davud Çavuş ve Mustafa Bey yedinden bi’t-tamâm ve’l-kemâl alıp kabz eyledim ba‘de’l-yevm husûs-ı mezbûra müte‘allik vechen mine’l-vücûh da‘vâ ve nizâ‘ım kalmadı dedikde mukırr-ı merkūmun vech-i meşrûh üzre olan kelimâtını mersûmûn Mehmed Çavuş ve Davud Çavuş ve Mustafa Bey bi’l-muvâcehe tasdîk ve bi’l-müşâfehe tahkīk edip tarafeynden sâdır ve bâhir olan ikrâr ve tasdîk mûcibince sıhhat-i ibrâya ve kat‘-ı nizâ‘a hükm olundukdan sonra bu vesîka-i şârihatü’l-beyân ve vâzıhatü’l-burhân cem‘ ve terkīm olunup yed-i tâlibe vaz‘ olundu ki lede’l-hâce mübeyyin-i hâl ola. Tahrîren fî evâsıtı şehri Zilka‘de sene sitte ve elf. Şuhûd: Ahmed Çelebi b. Mehmed, Mehmed Reis b. Ahmed, Mahmud Çelebi b. İslâm, Mahmud b. Ahmed, Abdülkādir Halîfe b. Hacı, Hüsrev b. Abdullah el-Muhzır, Mehmed b. Ali el-Muhzır