Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 324 Hüküm no: 422 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Resul’ün Hüseyin Bey’deki alacağını tahsil ettiği Mahmiye-i Galata dâhilinde vâki‘ Bereketzâde mahallesi sâkinlerinden olup bundan akdem vefât eden merhûm Hüseyin Bey b. Abdullah nâm müteveffânın zevce-i metrûkesi olan Âmine bt. Resul nâm hâtun meclis-i şer‘-i hatîr-i lâzımü’t-tevkīrde işbu sâhibü’l-kitâb mahmiye-i mezbûre ve Havâss-ı Kostantıniyye’de beytülmâl-i hâs emîni olup merhûm-ı mezbûrun muhallefâtına vâzı‘ü’l-yed olan Mehmed Çavuş b. Abdullah ve Davud Çavuş b. Abdullah ve beytülmâl-i mesfûrun nâzırı olan Mustafa Bey b. Abdullah nâm kimesneler muvâcehesinde takrîr-i kelâm ve ta‘bîr ani’l-merâm edip zevcim merhûm Hüseyin Bey’in zimmetinde bi hasebi’ş-şer‘i’ş-şerîf Mustafa b. Ahmed ve el-Hâc Rıdvan b. Abdullah nâm kimesneler şehâdetleri ile on bin akçe mehr-i müeccelim ve on bin akçe dahi alâ tarîki’l-mudârebe isbât eylediğim hakkım ve merhûm-ı mezbûrun cümle-i muhallefâtından intikāl eden rub‘ hissem mukābelesinde on iki bin akçeye ibrâ-i âm ile ibrâ ve iskāt eyleyip meblağ-ı merkūm on iki bin akçeyi mezkûrûn Mehmed Çavuş ve Davud Çavuş ve Mustafa Bey’in yedlerinden bi’t-tamâm ve’l-kemâl alıp kabz eyledim ba‘de’l-yevm merhûm-ı mersûmun muhallefâtına müte‘allik vechen mine’l-vücûh da‘vâ ve nizâ‘ım kalmadı dedikde mukırra-i merkūmenin vech-i meşrûh üzre olan kelimâtını mezbûrûn Mehmed Çavuş ve Davud Çavuş ve Mustafa Bey bi’l-muvâcehe tasdîk ve bi’l-müşâfehe tahkīk edip tarafeynden sâdır ve bâhir olan ikrâr ve tasdîk mûcibince sıhhat-i ibrâya ve kat‘-ı nizâ‘a hükm olundu ki bu vesîka-i şârihatü’l-beyân ve vâzıhatü’l-burhân cem‘ ve terkīm olunup yed-i tâlibe vaz‘ olundu ki vakt-i hâcetde mübeyyin-i hâl ve musaddık-ı makāl ola. Tahrîren fî evâsıtı şehri Zilka‘de sene sitte ve elf. Şuhûd: Es-Sâbikūn