Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 328 Hüküm no: 428 Orijinal metin no: [62a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle kalan tereke payının Âişe Hatun’dan alındığı Mahmiye-i Galata ve Havâss-ı Kostantıniyye’de beytülmâl emîni olan fahrü’l-emâsil ve’l-akrân Musa Çavuş b. Kaya mahfil-i kazâda bundan akdem Tophâne mahallâtından Yeni Bostan mahallesinden olup gemisi ile deryâya gark olan merhûm Hasan Reis b. Memi nâm müteveffânın zevcesi ve vârisesi Âişe bt. Hasan nâm hâtun mahzarında ikrâr ve i‘tirâf edip müteveffâ-yı mezbûrun zevcesi merkūme Âişe’den gayrı vâris-i ma‘rûfu olmayıp muhallefâtı beytülmâle râci‘ olmağın müteveffâ-yı mezbûrun zimem-i nâsda olan akçesiyle mevcûd olan esbâbı ba‘de’l-harc on altı bin akçe olup on iki bin akçesini mezbûre Âişe Hâtun yedinden bi’t-tamâm ve’l-kemâl alıp kabz eyledim dedikde mukırra-i mezbûr[en]in vech-i meşrûh üzre olan ikrârını mezbûre Âişe Hâtun bi’l-muvâcehe tasdîk eyledikden sonra mezbûre Âişe zikr olunan meblağdan gayrı eğer nakid akçe ve eğer esbâb alıkomadığına tahlîf olunup mâ hüve’l-vâki‘ ketb ve tahrîr olundu. Tahrîren fî evâhiri şehri Cumâdelûlâ sene seb‘a ve elf. Şuhûd: Musli b. Ahmed, Mustafa Abdülaziz, Mehmed Reis Mustafa, Hızır b. Eşref el-İmâm, Yahya Ramazan, Yusuf Abdurrahman, Şaban (…), Mustafa Abdullah, (…), Şaban b. Mustafa ve gayruhüm