Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 334 Hüküm no: 433 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahhuban bt. Hasan’ın evini kocası Seyyid Ali’ye satıp bedelini aldığı Mahmiye-i Galata müzâfâtından Kasımpaşa’da vâki‘ merhûm Sinan Paşa mahallesi sâkinelerinden Şahhuban bt. Hasan nâm hâtun tarafından husûs-ı âti’z-zikri ikrâra vekîl olup Ahmed Halîfe b. İlyas el-Müezzin ve el-Hâc Ahmed b. Mesud ve Mahmud b. Bayezid nâm kimesneler şehâdetleri ile şer‘an vekâleti sâbite olan fahrü’l-eimme Abdurrahman Halîfe b. Mehmed nâm kimesne meclis-i şer‘-i şerîf-i şamihü’l-bünyan ve mahfil-i dîn-i münîf-i râsihü’l-erkânda işbu sâhibü’l-kitâb mezkûre Şahhuban’ın zevci olan Seyyid Ali [b.] Mehmed nâm kimesne muvâcehesinde bi’l-vekâle ikrâr ve i‘tirâf edip müvekkilem mezkûre Şahhuban’ın mahalle-i merkūmede vâki‘ bir tarafı Pervâne bt. Abdullah nâm müteveffâtın Mustafa ve Fâtıma ve Ümmi nâm sagīrleri mülküne ve bir tarafı Okmeydanı demekle ma‘rûf olan mevzi‘e ve iki tarafı tarîk-i âm ile mahdûd olup beş aded beyt-i süflî ve bir beyt-i ulvî ve iki bi’ri mâyı ve cüneyneyi ve ahırı ve fırını ve bahçeyi müştemil olan mülk menzilini cümle tevâbi‘i ve levâhıkı ile zevci mezbûr Seyyid Ali’ye on beş bin akçeye bey‘ edip lâkin meblağ-ı merkūm on beş bin akçenin on iki bin akçesini târih-i kitâbdan iki yıl mukaddem alıp kabz edip ve hâlen üç bin akçesini dahi müvekkilem mezbûre Şahhuban zevci merkūm Seyyid Ali’den alıp cem‘an on beş bin akçeyi bi’t-tamâm ve’l-kemâl alıp kabz eyledi ba‘de’l-yevm menzil-i merkūm zevci mesfûr Seyyid Ali’nin mülk-i müşterâsı olup keyfe mâ yeşâ’ ve yahtâr mutasarrıf ola dedikde vekîl-i merkūmun vech-i meşrûh üzre olan kelimâtını mezkûr Seyyid Ali bi’l-muvâcehe tasdîk ve bi’l-müşâfehe tahkīk ettikden sonra sıhhat-i bey‘a ve cevâz-ı şirâya hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Zilka‘deti’ş-şerîfe sene sitte ve elf. Şuhûdü’l-hâl: Fahrü’l-ulemâ mevlânâ İbrahim Efendi b. Mehmed eş-şehîr bi Çavuşzâde, Şeyh Efendi el-Müderris, Seyyid Yusuf b. Seyyid Mahmud, Ferruh Bey b. Abdullah, Ferhad b. Abdullah, Halil Bey b. Abdullah el-Cündî, el-Hâc Cafer b. Abdullah, Mehmed b. Veli, Mustafa b. Ali, el-Hâc Mustafa b. el-Müezzin, Pîrî b. Mehmed, Hüseyin b. Abdullah el-Cündî, Osman b. İsmail el-Müezzin, Hüsrev b. Ali